Qazaqstannyń birqatar mekemeleri latyn jazýyna kóship úlgerdi -Ǵalymjan Meldeshov
«Birikken ulttar uıymynda 6 til bar. Olar: ıspan, frantsýz, aǵylshyn, orys, qytaı, arab tilderi. Sondaǵy úsh til latyn álipbıinde jumys júrgizedi. Osyǵan qarap, latyn jazýynyń álemdik arenadaǵy ornyn baǵamdaýǵa bolady», - deıdi ol.
Ǵalymjan Meldeshovtiń aıtýynsha, bul jazý bizge tańsyq emes, ótken ǵasyrdyń 30-jyldary qazaq halqy latyn jazýynda oqyp-jazdy. Qazir de birqatar mekemeler latyn qarpin paıdalanyp júr.
«QR ІІM TJ komıteti óz habarlamalaryn latyn jazýymen taratady. Bankter (Qazkom, Qazaq banki) latyn qarpine kóshti. Baıqasańyz, Koreıa, Japonııa elderi óz tilderin, óz jazýlaryn paıdalanady. Degenmen, ondaǵy tanymal brendter álemdik standartqa saı latyn jazýyn qoldanýda», - dep atap ótti Tilderdi damytý jáne qoǵamdyq saıası jumys komıteti tóraǵasynyń orynbasary.
Elbasy 2025 jyly latyn álipbıine tolyq kóshemiz, tutas el memlekettik tilde sóıleıdi degen oıdy aıtty. Ǵ. Meldeshovtiń pikirinshe, bul tekten-tek aıtyla salǵan joq. 2018 jylǵa deıin qazaq álipbıiniń jańa grafıkadaǵy biryńǵaı nusqasy qabyldanady. Odan keıin jańa álipbı úıretetin mamandar men oqýlyqtar daıyndalady. Odan keıingi jeti jyl az ýaqyt emes, jeti jylda latyn jazýynyń negizi qalanady.
«Tilderdi damytý komıtetimen birge, latyn álipbıin engizýge elimizdegi birqatar mekemeleri atsalysady. Atap aıtqanda, A.Baıtursynov atyndaǵy til ınstıtýty, Shaısultan Shaıahmetov atyndaǵy tilderdi oqytý ádistemelik ortalyǵy jáne óńirlerdegi memlekettik tildi jáne etnos tilderin oqytatyn 88 ortalyq. Sol mekemeler arqyly jańa álipbıdiń biregeı nusqasy bekitilip, irgesi qalanyp, oqý ortalyqtaryna taralady», - dedi ol.