Qazaqstannyń birqatar áýejaılarynda jóndeý jumystary júrgiziledi

NUR-SULTAN. QazAqparat - Aldaǵy bes jylda Qazaqstanda 13 áýe aılaǵy salynady. Bul týraly QR Indýstrııa jáne ınfraqurylymdyq damý mınıstri Beıbit Atamqulov málimdedi, dep habarlaıdy QazAqparat tilshisi.

«Bıyl biz Túrkistan qalasyndaǵy jańa jolaýshylar termınalyn iske qosýdy josparlap otyrmyz. Úrjar qalasynyń áýejaıyn qaıta jańartýdy bastaımyz. Sondaı-aq, Shymkent qalasynda áýejaıdyń jańa termınaly qurylysy men Oral qalasy áýejaıynyń aerovokzal keshenin qaıta jańartý jalǵasady», dep atap ótti mınıstr Úkimettiń onlaın otyrysynda.

Onyń aıtýynsha, qarjy bólingen jaǵdaıda Óskemen jáne Úsharal áýejaılarynyń ushý-qoný jolaqtaryn qaıta jańartý jumystary bastalady.

«Aldaǵy bes jylda 13 áýe aılaǵyn salý josparlanyp otyr. Qazirgi ýaqytta jergilikti áýe jelilerindegi úsh aılaq - Úsharal, Úrjar, Zaısanda jumys istep tur», - dedi B. Atamqulov.

Buǵan deıin mınıstr 2020-2025 jyldarǵa arnalǵan «Nurly jol» baǵdarlamasynyń qalaı júzege asatynyn baıandaǵan edi.