Qazaqstannyń birinshi kezekte qaı eldermen áýe qatynasyn ashatyny belgili boldy
«Qazaqstan aýmaǵynda koronavırýs ınfektsııasy taralýynyń aldyn alý boıynsha vedomstvoaralyq komıssııanyń otyrysynda Syrtqy ister mınıstrligi men Densaýlyq saqtaý mınıstrligine birlese otyryp, birneshe halyqaralyq áýe baǵyttaryn qaıta ashý boıynsha jumys júrgizýge tapsyrma berildi. Sonyń ishinde birinshi kezeńde COVID-19 boıynsha epıdemıologııalyq jaǵdaıynyń klassıfıkatsııalyq deńgeıine sáıkes, Ońtústik Koreıa, Qytaı jáne Ázerbaıjan kirdi. Biz atalǵan memleketterdiń avıatsııalyq basqarmalarymen áýe reısterin jandandyrý múmkindigin endi pysyqtaýdy bastap jatyrmyz», - dedi T. Lastaev Ortalyq kommýnıkatsııalar qyzmetindegi baspasóz máslıhatynda.
Onyń sózine qaraǵanda, ekinshi kezeńde epıdemıologııalyq qaýipsizdik deńgeıine baılanysty Túrkııa, BAÁ, Germanııa, Taıland jáne Chehııa qarastyrylady.
«Atap óter jaıt, bul reıster erteńnen bastap ashylmaıdy. Olar epıdemıologııalyq jaǵdaıǵa baılanysty jáne barlyq ınstantsııalarmen kelisý dárejesine qaraı jandanady. Reısterdiń naqty ashylýy kúni týraly qosymsha habarlaımyz», - dedi Talǵat Lastaev.