Qazaqstannyń biregeı tarıhy batys úshin óte qyzyqty baǵyt - Italııa depýtaty

ASTANA. QazAqparat - Qazaqstannyń biregeı baılyǵyn álemge pash etýimiz qajet. Týrıstik áleýeti jarqyn bolatynyna senimdimin. Italııa parlamentiniń depýtaty jáne Qazaqstanmen parlamentaralyq dostyq tobynyń prezıdenti Edmondo Chırıellı osyndaı yqylasyn bildirdi, dep habarlaıdy Habar 24 . 

Onyń aıtýynsha, Qazaqstannyń qasıetti jerleriniń kartasy nemese mádenı-geografııalyq beldeýdiń jasalǵany shetel saıahatshylarynyń nazaryn mindetti túrde ózderine aýdarady. «Rýhanı jańǵyrý» baǵdarlamasynda kórsetilgendeı kıeli jerdiń tizimi elge kelýshilerdiń sanyn arttyryp, týrızminiń negizi bolyp qalyptasýy múmkin. 

«Italııalyqtar jáne jalpy eýropalyqtar úshin tańsyq jerlerge saıahat jasaý janyna jaqyn bolyp keledi. Sondyqtan Eýropa men Azııanyń arasynda altyn kópir bolǵan Qazaqstannyń biregeı tarıhy batys úshin óte qyzyqty baǵyt bolary sózsiz. Búgingi tańda memleket týrızmi jaqsy uıymdastyrylǵan, qaýipsiz el bolyp sanalady», - dedi Italııa parlamentiniń depýtaty Edmondo Chırıellı.