Qazaqstannyń bes oblysynda 1,5 mln. gektar egistik alqaby kúıip ketken

ASTANA. 26 qyrkúıek. QazAqparat - Búgin Astanada ótken «Qazaqstan fermerleri odaǵy» RQB Ortalyq keńesiniń májilisinde aýyl sharýashylyǵy ónim óndirýshileri bıyl kúıip ketken astyq máselesin kóterip, memleketten tıisti kómek kórsetýdi surady.

Sharýalardyń sózine qaraǵanda, aǵymdaǵy jyly astyq alqaptarynyń basym bóligi ornalasqan Aqtóbe, Batys Qazaqstan Qostanaı, Aqmola jáne Qaraǵandy oblystarynda egistiktiń 1,5 mln. gektary kúıip ketken. Osy ispetti jaǵdaı tirkelgen Qazaqstanmen shekaralas Reseı aımaqtarynda búginde tótenshe jaǵdaı jarııalanyp, aýyl sharýashylyǵy ónim óndirýshilerine 1 gektar úshin 1,5 myń rýbl (7,5 myń teńge) kóleminde ótemaqy tóleý týraly sheshim qabyldandy.

«Negizi, bul - álemdik tájirıbe. Aýa raıynyń qolaısydyǵy týǵyzǵan qıyndyqtar kezinde memleket otandyq aýyl sharýashylyǵy ónim óndirýshilerine qoldaý jasaıdy. Máselen, Eýroodaq elderinde eshbir tótenshe jaǵdaısyz da memlekettik sýbsıdııalar 360 eýro/ gektardy qurap otyr. Qazaqstanda bolsa, ol kórsetkish 400-600 teńgeniń shamasynda. Bul - 3-aq eýro. Demek, bizdiń sýbsıdııalar Eýropamen salystyrǵanda, 120 esege az. Bul - tótenshe jaǵdaı bolmaǵan kezdegi sýbsıdııalar. Al qazirgi jaǵdaıda biz memlekettiń kómegine asa zárý bolyp otyrmyz», - deıdi Qazaqstan fermerleri odaǵynyń prezıdenti Áýezhan Darynov.