Qazaqstannyń basym bóliginde jaýyn jaýady, keı jerlerge burshaq jaýyp, shańdy daýyl turady – aýa raıy

ASTANA. QazAqparat – «Qazgıdromet» RMK-sy mamyrdyń 16-sy kúngi aýa raıy boljamyn jarııalady, dep habarlaıdy QazAqparat.

Kásiporynnyń derekterine qaraǵanda, ońtústik tsıklon jyrasynyń jáne onymen baılanysty atmosferalyq frontaldy bólimderdiń áserinen elimizdiń basym bóliginde kún raıy qubylmaly bolady. Jańbyr jaýyp, naızaǵaı oınaıdy, túnde oblystyń ońtústik-batysynda qatty jańbyr jaýady. Qazaqstannyń ońtústik-batysynda, ońtústiginde, ortalyǵynda burshaq jaýýy múmkin. Respýblıkanyń soltústiginde, shyǵysynda, ońtústik-shyǵysynda soltústik-batys antıtsıklonynyń áserinen kún jaýyn-shashynsyz bolady. Respýblıka boıynsha jel kúsheıip, soltústikte, shyǵysta tuman túsedi, ońtústikte shańdy daýyl turady.

Túnde Mańǵystaý oblysynyń ońtústiginde, shyǵysynda qatty jańbyr jaýady.

Túnde Aqmola oblysynyń batysynda, shyǵysynda, Pavlodar, Qaraǵandy oblystarynyń soltústiginde, shyǵysynda, Abaı oblysynyń batysynda, Shyǵys Qazaqstan oblysynyń shyǵysynda 1-3 gradýs úsik júredi, Soltústik Qazaqstan oblysynyń batysynda, Qostanaı oblysynyń soltústiginde topyraq betinde 2 gradýs úsik júredi.

Qyzylorda oblysynda, Túrkistan oblysynyń soltústiginde, ortalyǵynda, Aqtóbe, Ulytaý oblystarynyń ońtústiginde, Almaty oblysynyń soltústik-batysynda tótenshe órt qaýpi saqtalady.