Qazaqstannyń bastamasymen Búkilálemdik shahmat kúni belgilendi

NUR-SULTAN. QazAqparat – Birikken ulttar uıymynyń Bas assambleıasy 20 shildeni Búkilálemdik shahmat kúni dep jarııalady, dep habarlaıdy QazAqparat BUU jańalyqtary saıtyna silteme jasap.

Bul sheshimge Qazaqstan, Armenııa, Belarýs, Qyrǵyzstan, Reseı, Tájikstan, Túrikmenstan jáne Ózbekstan sekildi birqatar elderdiń bastamasy túrtki boldy.

Shahmat - eń ejelgi ıntellektýaldy jáne mádenı oıyndardyń biri sanalady. Onda sport, ǵylymı oı jáne mádenıet elementteri ushtasqan. Osyny eskergen BUU Bas assambleıasynyń músheleri búkil álem elderine Álemdik shahmat kúnin «tıisti deńgeıde» atap ótýdi usyndy.

BUU Bas assambleıasy jańa rezolıýtsııasynyń avtorlary búkil álem shahmat oınaıtynyn erekshe atap ótti. Ol ádildikti, ıntegratsııa men ózara syılastyqty kókke kóteredi, halyqtar men memleketter arasyndaǵy tózimdilik pen ózara túsinistik atmosferasynyń qalyptasýyna yqpal etedi.