Qazaqstannyń barlyq temir jol vokzaldaryn tekserý qurylǵylarymen jabdyqtaýǵa 2 mlrd. teńge jumsalady
Bul týraly búgin «Qazaqstan temir joly» UK» AQ-nyń vokzal sharýashylyǵy jónindegi dırektory mindetin atqarýshy Juban Kórpebaev málim etti, dep habarlaıdy QazAqparat.
Aıta keterligi, búgin ol buqaralyq aqparat quraldaryna Astana temirjol vokzalynda 1 sáýirden bastap tekserip kirgizý tártibi qalaı júrgiziletindigin tanystyrdy. «Temir jol vokzalynda jolaýshylardy tekserý protsedýrasyn bizdiń enshiles uıymymyz «Áskerılendirilgen temir jol kúzeti» AQ júrgizetin bolady. Olar sáıkesinshe oqytý sharasynan ótti jáne qural-jabdyq kómegimen tyıym salynǵan suıyqtyqtardyń, jarylǵysh zattardyń barlyq túrlerin anyqtaı alady», - dedi Juban Kórpebaev.
Onyń aıtýynsha, Almaty-1 jáne Almaty-2 temirjol vokzaldaryndaǵy tekserý qurylǵylary bir aıdan beri jumys istep tur. Osy ýaqyt aralyǵynda ÁTKQ qyzmetkerleri kinásinen oqys oqıǵa tirkelgen joq. Al 1 sáýirden bastap mundaı qurylǵylar elorda vokzalynda jumys isteı bastaıdy. Oǵan «Áskerılendirilgen temir jol kúzeti» AQ-nyń 149 qyzmetkeri jumyldyrylady.
Jalpy, aǵymdaǵy jyldyń shilde aıyna deıin elimizdiń iri qalalaryndaǵy barlyq temir jol vokzaldary tekserý qurylǵylarmen jabdyqtalmaq. Oǵan «Qazaqstan temir joly» kompanııasy 2 mlrd. teńgeden astam óz qarjysyn jumsamaq.
QR Úkimetiniń qaýlysyna sáıkes, jolaýshylardy tekserý lańkestik qaýiptiń deńgeıine baılanysty júrgiziledi. Lańkestik qaýip bolmaǵan jaǵdaıda, lańkestiktiń qalypty («sary») deńgeıinde jolaýshylar men olardyń qol júkteri ishinara, al lańkestiktiń qaýpi joǵary («alqyzyl») nemese qıyndyqty («qyzyl») deńgeıinde barlyq jolaýshylar men olardyń qol júkteri tekseriledi.
Tekserý kezinde asa qaýip týǵyzatyn (qarý, oq-dári, jarylǵysh zattar) zattar tabylǵan jaǵdaıda, tekserý júrgizýshi ınspektor arnaıy memlekettik qyzmet pen quqyq qorǵaý organdary qyzmetkerlerin qosymsha sharalar jasaý úshin shaqyrady.
Tekserý jasaýdyń negizgi maqsaty - kólik ınfraqurylymynda oqys oqıǵalarǵa aparyp soqtyrýy múmkin adamdardyń qurylǵylar men zattardy vokzal ishine alyp kirýin bolǵyzbaýdan týyndap otyr.