Qazaqstannyń barlyq munaı kompanııalary óz shyǵystaryn ońtaılandyrdy

ASTANA. QazAqparat - Qazaqstannyń barlyq munaı kompanııalary óz shyǵystaryn ońtaılandyrdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Energetıka birinshi vıtse-mınıstri Uzaqbaı Qarabalın málim etti.

U.Qarabalınniń atap ótýinshe, aǵymdaǵy jyly munaıdyń álemdik baǵasynyń aıtarlyqtaı quldyraýyna baılanysty teris saldar baıqalýda. Buǵan qosa, elimizdegi munaı ken oryndarynyń basym bóligi ken óndirýge ázirliktiń sońǵy satysynda tur. Sonymen qatar munaı baǵasynyń tómendeýi qara altyn óndirýdegi ekonomıkalyq tıimdilikke de teris áser etýde.

«Ken ornynyń jumys qabilettiligin saqtaý, jumys oryndary qysqarylýynyń aldyn alý maqsatynda barlyq munaı kompanııalary shyǵystaryn, eń birinshi kezekte kúrdeli shyǵystaryn ońtaılandyrý jumystaryn júrgizdi. Munaı óndirýge tikeleı kedergi keltirmeıtin birqatar jobalar jaqsy kezeńge deıin toqtatyldy», - dedi ol.

Birinshi vıtse-mınıstrdiń sózine qaraǵanda, Energetıka mınıstrligi munaıdyń álemdik baǵasynyń aıtarlyqtaı quldyraýyn eskere otyryp, respýblıka boıynsha munaı óndirý kórsetkishteriniń boljamyn naqtylaý boıynsha saraptama júrgizgen.