Qazaqstannyń balyq ónimderi Eýropa elderine eksporttalady

ASTANA. QazAqparat - 15 naýryzdan bastap Eýropalyq komıssııa qazaqstandyq balyq kásiporyndaryn óz ónimderin Eýropalyq Odaq elderine eksporttaýǵa quqyǵy bar kompanııalar tizimine engizý rásimin qaıta bastaıdy, dep habarlaıdy QazAqparat Aýyl sharýashylyǵy mınıstrligine silteme jasap.

QR Aýyl sharýashylyǵy mınıstrligine kazaqstandyq veterınarııalyq baqylaý júıesine degen senimdi qalpyna keltirý týraly tıisti hat joldandy.

Osylaısha, óz ónimderin EO-qa eksporttaýǵa quqyǵy bar otandyq kásiporyndardyń tizimi keńeıtiletin bolady.

Búgingi tańda tizilimde 17 qazaqstandyq kompanııa bar.

Aıta keteıik, 2018 jyly Eýropalyq komıssııa balyq ónimderin óndiretin kásiporyndarǵa aýdıt júrgizdi.

Onyń qorytyndysy boıynsha 11 usynys berildi, onyń ishinde eldiń veterınarlyq qyzmetin baqylaý boıynsha usynys bar.

Keıin qazaqstandyq tarap usynymdardyń oryndalýy týraly egjeı-tegjeıli esep joldady.

Qazaqstanmen qarym-qatynasty odan ári nyǵaıtý jáne EO elderine eksporttalatyn ónimderdiń tizimin keńeıtý aıasynda Eýropalyq komıssııa bolashaqta eýropalyq naryqqa shyǵarýǵa bolatyn bal ónimi boıynsha saýalnama jiberdi.

Esterińizge sala keteıik, Aýyl sharýashylyǵy mınıstri Erbol Qarashókeev Brıýsselge sapary aıasynda eýropalyq komıssarlarmen kezdesken bolatyn.

Kelissóz barysynda AShM basshysy Qazaqstannyń joǵary sapaly organıkalyq azyq-túlik jetkizýshisi bolý múmkindigi týraly habardar etti.

Atap aıtqanda, Eýroodaq elderine otandyq et, sút, qus jáne balyq ónimderin eksporttaý týraly sóz qozǵaldy.