Qazaqstannyń balamaly energııa kózderi aýktsıonda saýdalanady

ASTANA. QazAqparat - 2018 jyldyń 23 mamyrynda Qazaqstannyń balamaly energııa kózderi jobalaryn irikteý boıynsha alǵashqy halyqaralyq aýktsıon ótedi, dep habarlaıdy QazAqparat tilshisi.

Aýktsıonǵa shyǵarýǵa josparlanǵan qýattyń jalpy kólemi 1000 MVt quraıdy.

«Ótken jyldan beri aýktsıondyq mehanızm baǵytyn damytyp, zańǵa ózgeris engizdik. Barlyq erejelerdi ázirledik. Aýktsıonǵa josparlanǵan 1000 MVt qýattyń 600 MVt astamy - jel stansylary bolmaq, sebebi Qazaqstannyń jel qýatyndaǵy áleýeti zor. Qalǵan 300-den astam MVt - kún generatsııasy, gıdroenergetıka jáne bıogaz qondyrǵylaryna qatysty jobalar», -  dedi QR Energetıka mınıstrligi Jańartylatyn energııa kózderi departamentiniń dırektory Aınur Sospanova OKQ-da ótken baspasóz máslıhatynda.

Onyń aıtýynsha, aýktsıonǵa ótinim berý tártibi barynsha ońtaılandyryldy jáne oǵan tólem qabiletin rastaǵan kez kelgen kompanııa ókili qatysa aldy.

Sonymen birge, aýktsıondy ótkizýge jaýapty «Korem» AQ tóraǵasynyń orynbasary Erjan Mádıev satylym tártibin túsindirip berdi.   

«QR Energetıka mınıstrligi saıtynda aýktsıon kestesi jarııalandy. Onda satyp alynatyn energııanyń kólemi, kún, jel men sý elektr stansalary salynatyn aımaqtar jáne shekti tarıfter kórsetiledi.  Aýktsıon 3 saǵatqa sozylady jáne barlyq qatysýshylarǵa birdeı quqyq beriledi. Nátıjesinde, balamaly energııany eń arzan tarıfpen satamyn degen qatysýshy jeńimpaz atanady. Osylaısha, kún, jel, ıa bolmasa, sý elektr stansasyn salyp, sol jerde óndirgen energııany memleketke sata alady», - dep túsindirdi Erjan Mádıev.

BEK aýktsıondaryn jylyna eki ret ótkizý josparlanǵan. Kóktemgi satylymda shaǵyn jobalarǵa, al kúzde - iri jobalarǵa aýktsıondar ótkiziledi.

Foto: energyministerial.kz