Qazaqstannyń azamattyq alıansy memleketten úkimettik emes uıymdarǵa amnıstııa jarııalaýdy surap otyr

ASTANA. 1 qarasha. QazAqparat - Qazaqstannyń azamattyq alıansy memleketten úkimettik emes uıymdarǵa amnıstııa jarııalaýdy suramaq. Bul týraly búgin Qazaqstannyń azamattyq alıansy uıymynyń basshysy Nurlan Erimbetov QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda málim etti.

Onyń atap kórsetkenindeı, qazirgi tańda Qazaqstanda 27 myń ÚEU tirkelgen. Degenmen olardyń barlyǵy birdeı qoǵamdyq jumystardy atqaryp jatqan joq. Tipti qaǵazbastylyqtan óz uıymdaryn jaba almaı, salyqtyq qaryzdardan aryla almaı otyrǵandary qanshama.

"Bizdiń kóptegen qoǵamdyq uıymdar jumys jasap jatqan joq. Óıtkeni kezinde úkimet memlekettik satyp alý erejelerin ózgertken kezde onyń basym bóligi jabylyp qaldy. Alaıda olar áli resmı túrde uıymdy tirkeýden almaǵan. Salyqtyq aıyppuldary da qomaqty deńgeıge jetken. Biz Úkimetten olardyń amnıstııasyn jarııalaýdy suramaqpyz. Adamdar aıyppuldaryn joıyp, uıymdaryn resmı túrde jabýǵa múmkindik alýlary úshin", - dedi N.Erimbetov.