Qazaqstannyń aýmaǵynda qalyp qoıatyn tranzıt júk kólikteri kóp – depýtat

NUR-SULTAN. QazAqparat – Májilis depýtaty Pavel Kazantsev basqa elden keletin júk kólikteriniń Qazaqstannyń zańyna baǵynbaýynan bıýdjetke edáýir qomaqty qarajat túspeı jatqanyn málimdedi, dep habarlaıdy QazAqparat tilshisi.

«Erejege baǵyna qoımaıtyn júk tasymaldaýshylar bar. Máselen olar «Qazaqstan arqyly basqa elge taýar apara jatyrmyz» deıdi de, tranzıt – tranzıtpen aıaqtalmaı, júk bizdiń eldiń aýmaǵynda qalyp qoıady. Sol sekildi júk tasymaldaýshylar Qazaqstannyń belgili bir óńirine «osynsha ónim taýar apara jatyrmyz» degenimen, júk ol óńirge jetpeı, basqa aımaqqa «sińip» ketedi. Mundaı qýlyqtyń arqasynda júk tasymaldaýshy qosymsha qun salyǵy (QQS) men basqa da salyqtardy tólemeı, bizdiń elde kóleńkeli ekonomıka, jaýapsyz básekelestik, «sur jáne qara ekonomıka» gúldeıdi. Bulaı kete berse problemalardyń tutas legimen betpe-bet kelemiz. Sol sebepti bul zań jobasynyń basty maqsatynyń biri – osy problemalarǵa jol bermeý», - dedi Parlament Májilisinde depýtat Pavel Kazantsev halyqaralyq avtomobıl tasymaldaryn qadaǵalaý týraly zań jobasyn qorǵaý barysynda.

Onyń aıtýynsha 2019 jyly Qazaqstanda qosymsha qun salyǵyn tólemegen 60 myńǵa tarta kólik anyqtalǵan. Tranzıtpen ketemiz degen 11 myń kólik Qazaqstan aýmaǵynda qalyp qoıǵan.

«Іrikteý arqyly taldaý júrgizgen kezde Qazaqstan osy problemalardyń keselinen bıýdjetke kelýi tıis 25 mlrd teńgeniń jetpeı qalǵany anyqtaldy. ıAǵnı osy zań jobasy arqyly máselelelerdi retke keltirsek, eń kem degende bıýdjetke 25 mlrd teńge salynyp otyrady. Sonymen qatar Qazaqstan aýmaǵyna kelgen júk kólikteriniń bárin de tártipke baǵyndyra alar edik», - dedi ol.

Eske sala ketsek búgin Parlament Májilisinde «QR keıbir zańnamalyq aktilerine halyqaralyq avtomobıl tasymaldaryn qadaǵalap otyrý máseleleri boıynsha ózgerister men tolyqtyrýlar engizý týraly» zań jobasy tanystyrylǵan bolatyn.