Qazaqstannyń áýe kompanııalary 2020 jyly 5,5 mln jolaýshy tasymaldady - mınıstrlik

NUR-SULTAN. QazAqparat - 2020 jyldyń qorytyndysy boıynsha Qazaqstannyń áýe kompanııalary 5,5 mln. adam tasymaldady. Bul 2019 jylǵa qaraǵanda 36% tómen.

QR Indýstrııa jáne ınfraqurylymdyq damý vıtse-mınıstri Berik Kamalıev mınıstrliktiń alqa otyrysynda atap ótkenindeı, buǵan pandemııa kezinde ushýlarǵa qoıylǵan shekteýler áser etti, dep habarlaıdy QazAqparat.

Qalyptasqan jaǵdaıǵa baılanysty azamattyq avıatsııa ekonomıkanyń eń kóp zardap shekken salalarynyń biri boldy. Sony jeńildetý úshin otandyq áýe kompanııalary men áýejaılar úshin salyqtyq jeńildikter boıynsha memlekettik qoldaý sharalary qabyldandy.

Búgingi tańda 45 baǵyt boıynsha ishki áýe reısteri qaıta ashyldy jáne 12 elmen (Túrkııa, Koreıa, BAÁ, Belarýs, Ýkraına, Germanııa, Ózbekstan, Qyrǵyzstan, Egıpet, Reseı, Maldıv, Shrı-Lanka) áýe qatynasy qalpyna keltirildi.