Qazaqstannyń astyq vagondary Aýǵanstan baǵytyndaǵy kepteliste qalyp qoıdy
«Qazan - qarashada astyq tıeý úshin vagon parkynyń qajettiligi kezinde belgili bir tapshylyq baıqaldy. Osy oraıda buǵan tıisti máseleler yqpal etti. Birinshiden, bıyl Reseıde astyq kólemi aıtarlyqtaı kóp shyqty. Atap aıtqanda, Reseıde -133 mln, Ýkaraınada - 90 mln deńgeıinde. Bul astyqtyń osy aýqymdy kólemi bizdiń dástúrli naryqtarǵa, ıaǵnı Ázerbaıjan, Grýzııa jáne Túrkııaǵa qaraı baǵyt aldy. Nátıjesinde, bizdiń astyq negizinen Aýǵanstan naryǵyna qaraı shoǵyrlandy. Osy oraıda aýǵan jaǵyndaǵy ınfraqurylym Qazaqstannan jetkiziletin astyq kólemine sáıkes kelmeıtini túsinikti. Bizde Galaba jáne Haıraton atty túıisetin stansalarda osy merzimde belgili bir keptelis jaǵdaıy oryn aldy. Sáıkesinshe, júk aınalymy men atalǵan baǵytta vagondardyń qaıtarylýy qarqyny tómendedi», - dep túsindirdi N. Áltaev Parlament Májilisi Agrarlyq máseleler komıtetiniń otyrysynda.
Onyń sózine qaraǵanda, qazirgi kezde Galaba stansasynda 3,5 myń vagon tur. Olardyń bastapqylary 4 qarashada jóneltilgenimen, áli de Qazaqstanǵa oralmady.
Vıtse-mınıstrdiń atap ótýinshe, 2018 jyldyń kóktemine deıin bıdaı ımportyna Iran tarapy engizgen shekteýmen saladaǵy jaǵdaı ýshyǵa tústi. Iranǵa josparlanǵan astyq eksporty da Aýǵanstan jaǵyna qaıta baǵyttaldy.
N. Áltaevtyń aıtýynsha, astyq tıeýge arnalǵan vagondardyń tapshylyǵy týyndaǵan kezde qajetti sharalar qabyldandy. Bul rette basqa elderden 2 270 vagon tartyldy. Sonymen qatar aptanyń sońyna deıin Qazaqstanǵa taǵy 1 000 vagon, Jańa jylǵa deıin - 500, al 2018 jyldyń 10 qańtaryna deıin taǵy 500 vagon jetkiziledi.