Qazaqstannyń áskerıleri Elbrýs shyńyn baǵyndyrdy (FOTO)

ASTANA. QazAqparat - Armııa halyqaralyq oıyndary sheńberinde Kabardın-Balqarda «Elbrýs shyǵyrshyǵy» baıqaýy aıaqtaldy. Saıysqa Qazaqstan, Reseı, Qytaı jáne Irannyń komandalary qatysty, dep habarlaıdy QR Qorǵanys mınıstrliginiń baspasóz qyzmeti.

Jarystyń 10 kúni ishinde qatysýshylar bıiktikterdiń úlken qulamalary bar uzyndyǵy 105 shaqyrymdyq baǵdardan ótti, taýly ótkelderdi, muz aıdyndaryn, ózenderdi eńserdi. Sondaı-aq, eýropalyq qurlyqtyń joǵary núktesi - Elbrýs taýynyń shyńyna shyqty. Qazaqstandyqtar bul saıysta úshinshi oryn ıegerleri atandy.

«Tek joǵary kásipqoılyq, rýh pen erlik kúshi ǵana saıys qatysýshylaryna baǵdardyń barlyq qıyndyqtaryna tótep berýge jáne Elbrýs shyńynda týlaryn jelbiretýge múmkindik berdi.  «Elbrýs shyǵyrshyǵy» halyqaralyq baıqaýy seriktestik qarym-qatynasty damytý, ártúrli elderdiń qarýly kúshteri arasynda senim men ózara túsinistikti nyǵaıtý úshin qarymdy yntalandyrý boldy», - dedi RF Qorǵanys mınıstriniń orynbasary Nıkolaı Pankov.

Armııa halyqaralyq oıyndaryndaǵy qyzý tartysta qazaqstandyq desantshylar taǵy bir kúmis medaldar jıyntyǵyn jeńip aldy. Novorossııskń mańyndaǵy Raevskıı polıgonynda «Desanttyq vzvod» halyqaralyq baıqaýy aıaqtaldy.  Qazaqstan Respýblıkasy Qarýly kúshteriniń komandasy Qytaı men Belorýssııanyń komandalarynan ozyp, dúbirli dodada ekinshi oryndy enshiledi.

Parashıýttik-desanttyq jáne desanttyq-shabýyldaý bólimsheleriniń «Desanttyq vzvod» halyqaralyq baıqaýy 4 kezeńde ótti.  Saıystarǵa Reseı, Qazaqstan, Belorýssııa, Qytaı, Iran, Mysyr jáne Venesýelanyń áskerı qyzmetshileri qatysty.