Qazaqstannyń áskerı qyzmetshileri Úndistannyń bitimgershi ofıtserlerinen dáris alyp jatyr (FOTO)
Kongo, Malı, Batys Sahara men Kot-d'Ivýardaǵy beıbitshilik pen qaýipsizdikti qamtamasyz etý jóninde BUU-nyń bitimgershilik mıssııalaryna qatysyp, mol tájirıbe jınaǵan Úndistannyń bitimgershilik operatsııalar ortalyǵynyń ofıtserleri podpolkovnık Sıngh Narındjan men maıor Ranaýat Bhavanı Qazaqstanǵa keldi. Úndistannyń ofıtserleri qazaqstandyq áskerı qyzmetshilerdi beıbitshilik pen qaýipsizdikti saqtaý jónindegi operatsııa negizderine oqytyp, úıretedi. Búgin alǵashqy tanystyrý sabaǵy bastaldy. Onda teorııa júzinde úndi bitimgershileri BUU-nyń qurylymyn, qandaı mıssııalar bar ekenin túsindiredi. Trenıngke barlyǵy 18 qazaqstandyq áskerı qyzmetshi, ıaǵnı, 12 ofıtser jáne 6 kelisimshart boıynsha áskerı qyzmetshi qatysýda.
«Trenıngke qatysyp otyrǵan barlyq qazaqstandyq áskerı qyzmetshiler aǵylshyn tilin jetik biledi, dáris te aǵylshyn tilinde ótedi. Jaýyngerlerimizge arnalǵan bitimgershilik daıyndyq boıynsha trenıng 11 jeltoqsanǵa deıin jalǵasady», - dedi bitimgershilik operatsııalar ortalyǵynyń bastyǵy podpolkovnık Baqytjan Jetpisov.
Bitimgershilik qyzmettiń halyqaralyq mindettemelerdi oryndaýda, áskerı-saıası ustanymdardy, múddelerdi jáne jalpy álemdik arenada elimizdiń bedelin arttyrýda memleket úshin úlken máni bar ekenin aıta keteıik. Osy maqsatta QR Qarýly kúshterinde qazaqstandyq bitimgershilik brıgadasy jumys jasaıdy. Qazaqstan Qarýly kúshteriniń bitimgershileri jyl saıyn shetel memleketteri qarýly kúshteriniń ókilderimen birlesip «Dala qyrany», «Myzǵymas baýyrlastyq» jáne basqa da oqý-jattyǵýlarǵa qatysady.