Qazaqstannyń áskerı qyzmetshileri «Taktıkalyq mergen» baıqaýynda kósh bastap tur

NUR-SULTAN. QazAqparat - Elimizdiń úsh polıgonynda, Ázerbaıjanǵa qaraıtyn sý aýmaǵynda, armıannyń Dılıjanynda, Kabardıno-Balkarııa men Máskeý oblysynda qazaqstandyq jaýyngerler Halyqaralyq armııa oıyndaryna qatysyp, jaqsy nátıjeler kórsetip jatyr.

Bul týraly QazAqparat QR Qorǵanys mınıstrliginiń baspasóz qyzmetine silteme jasap habarlaıdy.

Qaraǵandy oblysynda ótip jatqan «Taktıkalyq mergen» baıqaýynyń kezekti kezeńinde Qazaqstan komandasy jeńiske jetti. Eki jaýynger jarysynda áskerı qyzmetshiler tosqaýylǵa túsken kezdegi taktıkalyq jáne atys tapsyrmalaryn oryndady. Qatysýshylar qalqalana otyryp jyljyp, nysanaǵa oq jaýdyrdy. Qazaqstandyq jaýyngerlerdiń nátıjeli áreketteri baıqaýdyń sońǵy kezeńinde olardy jeńiske jetkizdi. Ekinshi orynda – Reseı áskerı qyzmetshileri, úshinshi orynda – Qytaı.

Ázerbaıjan Respýblıkasynyń Pýta áskerı-teńiz bazasy aýmaǵyndaǵy teńiz polıgonynda sýústi kemeleri ekıpajdarynyń «Teńiz kýbogy» atty saıysy jalǵasýda. Áskerı teńizshiler áýe nysanasyna artıllerııadan oq atty. Bul tapsyrmany jarystyń barlyq qatysýshylary sátti oryndap, 45 upaıdan jınady. Úsh jattyǵýdyń qorytyndysy boıynsha qazaqstandyq teńizshiler 132 upaı sanymen ekinshi orynda. Birinshi oryndy teńdeı 135 upaı jınaǵan Ázerbaıjan men Reseı kemeleriniń ekıpajdary ózara bólisti.

Kabardıno-Balkarııadaǵy «Terskol» taý daıyndyǵy jáne aman qalý oqý-jattyǵý ortalyǵynda ótip jatqan «Elbrýs sheńberi» baıqaýynda áskerı qyzmetshiler taýdaǵy kedergilerden ótip, top quramynda atys jattyǵýyn oryndady. Jarystyń alty arnaıy tapsyrmasyn oryndaǵannan keıin Qazaqstan komandasy básekelesterinen sál artta qalyp, tórtinshi orynǵa taban tiredi. Birinshi oryndy – Reseı, ekinshi oryndy – Ózbekstan, úshinshi oryndy – Qytaı alpınısteri ıelendi. Alda jaýyngerlerge taýdaǵy asa kúrdeli jarys kezeńi ótkiziledi, nátıjesine sáıkes baıqaýdyń jeńimpazdary men júldegerleri anyqtalady.

Armıan eliniń Dılıjan polıgonyndaǵy «Beıbitshilik jaýyngerinde» «Erýdıt» zııatkerlik kezeńi aıaqtaldy. Áskerı tarıhty, geografııany, halyqaralyq gýmanıtarlyq quqyqty, álemdik óner men ádebıetti bilýge arnalǵan jarysta qazaqstandyq jaýyngerler Reseı men Belarýs áskerı qyzmetshilerinen keıingi úshinshi orynǵa turaqtady. Alda sheshýshi jarystar ótetin bolady, sondyqtan áli qazaqstandyq komandanyń jeńiske jetýge degen múmkindigi bar.