Qazaqstannyń áskerı qyzmetkerleri ArMI-2018 saıystarynda kósh bastap keledi

OTAR. QazAqparat -«Otar» 40-shy áskerı bazasynda ArMI-2018 aıasyndaǵy halyqaralyq baıqaýlarǵa qatysýshylar arasynda saıystar jalǵasýda, dep habarlaıdy QazAqparat tilshisi QR Qorǵanys mınıstrliginiń baspasóz qyzmetine silteme jasap.

«Artıllerııalyq alaý» sheberleri saıysynyń birinshi kezeńiniń jalpy reıtıngine sáıkes, komandalar quramalarynyń ekinshi esebi arasynda qazaqstandyq áskerı qyzmetkerler ekinshi jáne úshinshi orynǵa taban tiredi. Birinshi oryndy Reseıden kelgen qatysýshylar ıelendi.

12 komandanyń árqaısysynda 3 esepten bar. «Suńqardy ańǵa salý» saıysynyń birinshi kezeńdegi úsh jattyǵýdyń nátıjesi boıynsha, Qazaqstannyń áskerı qyzmetkerleri birinshi orynda tur, ekinshi orynǵa Belorýssııa jáne Iran komandalary ornalassa, reseılik komandalar úshinshi orynǵa taban tiredi. «Senimdi ádis» saıysynyń aıaqtalǵan eki kezeńiniń nátıjesi boıynsha, qazaqstandyq komanda eń kóp upaı jınap, kósh bastap tur. Ekinshi orynǵa Belorýssııanyń baılanys qyzmetkerleri, úshinshi orynǵa Qytaıdyń qatysýshylary ornalasty.

4 tamyzda Qazaqstan aýmaǵyndaǵy saıystardan bólek, otandyq áskerı qyzmetkerler «Teńiz kýbogy» baıqaýynda ozyp shyqty. Sondaı-aq, «Qarý jasaý sheberi», «Elbrýs saqınasy» jáne «Dalalyq as úı» baıqaýlarynda jerlesterimiz ekinshi oryndy jeńip alsa, «Snaıperlik shep», «Tanktik bıatlon» jáne «Áskerı-medıtsınalyq» estafeta saıystarynda úshinshi oryn ıegerleri atandy.