Qazaqstannyń Áskerı-áýe kúshteri jańa áskerı-kóliktik tikushaqtarmen tolyqty (FOTO)
Tikushaqtar «Reseı tikushaqtary» holdıngine kiretin qazaqstandyq tarap pen Ulan-Ýde avıatsııalyq zaýyty arasynda budan buryn jasalǵan kelisimshartqa sáıkes ushyp keldi, dep habarlaıdy QR QM baspasóz qyzmeti.
Avıabazanyń ushý jáne ınjenerlik-tehnıkalyq quramy óndirýshi zaýytta teorııalyq jáne ushý daǵdysynan ótti.
Mı-171Sh tikushaǵy Mı-8 úlgisindegi tikushaqtardyń sońǵy modıfıkatsııasynyń biri bolyp tabylady. Joǵary ushý-tehnıkalyq sıpattamalary, senimdilik, Tselsııa boıynsha -50-den +50 gradýsqa deıingi aýa raıy jaǵdaıy men temperatýranyń keń dıapazonynda qoldaný múmkindigi, kóp fýnktsıonaldylyǵy, paıdalaný men qyzmet kórsetýdegi qarapaıymdylyǵy sekildi bul tikushaqtardyń qasıetteri búkil álemdegi operatorlardyń seniminen shyǵa bildi.
Desanttyq-kóliktik tapsyrmalardy oryndaýdan basqa, bul tikushaq qurlyqtaǵy bólimshelerdi qoldaý, qarsylastyń jandy kúshin, brondy tehnıkany, bekitilgen oq atý núkteleri men ózge de qozǵalmaly jáne qozǵalmaıtyn nysanalardy joıý, desantty atyspen qoldaý, áskerı lekterdi alyp júrý, patrýldeý, izdeý-qutqarý jáne barlaý operatsııalaryn júrgizý úshin arnalǵan.
Avıatsııalyq parkti jańa tikushaqtarmen tolyqtyrý jalpy alǵanda, Áskerı-áýe kúshteri men Qazaqstan Respýblıkasy Qarýly Kúshteriniń jaýyngerlik qabilettiligin arttyrýǵa múmkindik beredi.
Saltanatty is-sharaǵa QR QK Áýe qorǵanysy kúshteriniń bas qolbasshysy avıatsııa general-maıory Nurlan Ormanbetov pen Áskerı-áýe kúshteriniń qolbasshysy avıatsııa general-maıory Dáýren Qosanov, QR Qarýly Kúshteriniń ardagerleri, jergilikti bılik organdarynyń, sondaı-aq óndirýshi zaýyttyń ókilderi qatysty.