Qazaqstannyń árbir azamaty Elbasy usynǵan reformalardy júzege asyrýǵa belsene atsalysýy tıis - M. Jurynov

ALMATY. QazAqparat- Qazaqstannyń árbir azamaty Elbasy usynǵan reforalardy júzege asyrýǵa belsene atsalysýy tıis. Bul týraly búgin «QazAqparat» tilshisine bergen suhbatynda QR UǴA prezıdenti, hımııa ǵylymdarynyń doktory Murat Jurynov memleket basshysy Nursultan Nazarbaevtyń «Ult jospary - qazaqstandyq armanǵa bastaıtyn jol» maqalasyna qatysty osyndaı pikir bildirdi.

Ǵalym óz sózinde Elbasynyń kóptegen kókeıkesti máselelerge der kezinde jaýap bergendigin aıtty. Óıtkeni, bul jyl búkil álem úshin ońaı bolmaıyn dep tur.

«Qazaqstan qaryshtap damyp kele jatqan memleket. Aldymyzda álemniń eń damyǵan 30 eliniń qataryna ený mindeti tur. Bul úshin 5 ınstıtýtsıonaldy reformany júzege asyrý boıynsha Ult jospary - «100 naqty qadam» qolǵa alyndy. Ony daǵdarys kezinde qalaı júzege asyrý kerektigi Elbasynyń maqalasynda aıqyn kórsetilgen. Memleket basshysy aıtyp ótkenindeı, kez-kelgen reforma zańmen qamtamasyz etilýi tıis. Sondyqtan, Úkimet pen Parlament zańnamalardy ózgertý boıynsha qyrýar jumystar atqardy», - dedi M. Jurynov.

Ol sonymen qatar, qabyldanǵan zańdarda ásirese, sybaılas jemqorlyqqa qarsy kúres máselesine kóp kóńil bólingendigin jetkizdi.

«Qazaqstannyń árbir azamaty Elbasy usynǵan reforalardy júzege asyrýǵa jáne myqty, zaıyrly memleketimizdiń qalyptasyp, nyǵaıýyna belsene atsalysýy tıis. Bul úshin biz elimizde beıbitshilik pen ultaralyq tatýlyqty jáne ózara syılastyqty saqtaı otyryp, azamattardyń ómir súrý sapasyn arttyrýǵa kúsh salýymyz kerek», - dedi akademık.