Qazaqstannyń ár oblysynda myqty ýnıversıtetter qurylýy múmkin (FOTO)
Bul týraly búgin QR Bilim jáne ǵylym mınıstri Aslan Sárinjipov búgin Astanada elimizdiń 10 úzdik magıstrantyna N.Nazarbaev atyndaǵy stıpendııalardy tabys etý rásimi barysynda málim etti.
«Qazir biz «Bilim berýdi damytý» memlekettik baǵdarlamasyn jasaýdamyz. Oǵan qatty kirisken jaıymyz bar. Memleket úshin kelesi kezeńde ár aımaqta jaqsy joǵary oqý orny bolǵany jaqsy bolar edi. Bul sol óńirdiń damý qazyǵyna aınalady. Tájirıbe bar, AQSh-ta tutas shtattyń damýyna yqpal jasap otyrǵan ýnıversıtetter jetkilikti. Onda zertteýler, jańa tehnologııalar damyp qana qoımaı, jańa ıdeıalarǵa toly kadrlar jasaqtalyp shyǵady. Keıin olar oqý bitirgennen soń sol shtattyń damýyna úles qosty. Mysaly 1800-shi jyldary AQSh-ta Lendgrand ýnıversıtetine tegin jer berildi. Bul jerdiń aqysyna olar sol óńirde bilim ordasyn qurýlary tıis bolǵan. Sonyń arqasynda atalǵan óńirde qarqyndy damý baıqaldy. Biz osyndaı mejege talpynýymyz kerek», - dep atap ótti mınıstr.
Onyń aıtýynsha, ár óńirdiń ındýstrıaldyq basymdyqtaryn eskerý qajet.
«Bizge de ár oblysymyzda jaqsy bir joǵary oqý orny ashylǵany qajet. Pavlodar, Óskemen, Astana, Aqtaý sııaqty iri qalalarda myqty ýnıversıtetter qurylsa, ol aımaqtarda ómir qaınaıdy. Menińshe, bizdiń el úshin ol kelesi kezeń dep esepteımin. Osyǵan oraı, biz Údemeli ındýstrıaldyq-ınnovatsııalyq damý memlekettik baǵdarlamasynyń 10 ýnıversıteti jobasyn bastamaqpyz. Bul AQSh-taǵy tájirıbeniń prototıpi bolady. Biz jetekshi ýnıversıtetterdiń tek Astana men Almatyda ǵana emes, ózge óńirlerde de bolǵanyn, sol oblystyń óz erekshelikterine saı myqty JOO-nyń qurylǵanyn qalaımyz», - dedi A.Sárinjipov.