Qazaqstannyń altyn-valıýta qory artty

ASTANA. QazAqparat - 2017 jylǵy toǵyz aıda Ulttyq banktiń altyn-valıýta qory 10,2 paıyzǵa artty. Bul týraly búgin Ortalyq kommýnıkatsııalar qyzmetindegi brıfıngte QR Ulttyq banki tóraǵasy Danııar Aqyshev málim etti, dep habarlaıdy QazAqparat.

«2017 jylǵy toǵyz aıda Ulttyq banktiń altyn-valıýta rezervteri 10,2 paıyzǵa artyp, 32,5 mlrd dollarǵa deıin ósti. Ulttyq qordyń shetel valıýtasyndaǵy aktıvteri 56,8 mlrd dollardy qurady. Al halyqaralyq rezervter 89,4  mlrd dollardy qurady. Bul ishki jalpy ónimniń 60 paıyzyna teń», - dedi Danııar Aqyshev.

Sonymen qatar Ulttyq bank tóraǵasy elimizdiń aqsha jáne valıýta naryqtaryndaǵy ahýalǵa da toqtaldy.

«9 qazandaǵy sheshim boıynsha bazalyq stavka 10,25 paıyz deńgeıinde saqtaldy. Ulttyq bank úshin naryqtaǵy stavkalardyń nysanaly máni TONIA ındıkatory bolyp tabylady. Ol nysan dálizdiń  tómengi shegine jaqyn qalyptasady. Qyrkúıekte ol tómengi shekten tómen tústi. Bul  avtomatty REPO sektoryndaǵy teńgelik ótimdilik usynysynyń ósýine baılanysty boldy. 22 qyrkúıekten bastap TONIA ındıkatory bazalyq stavka dálizi sheginde saqtalýda», - dedi ol.

Onyń aıtýynsha, Ulttyq banktiń aqsha naryǵyndaǵy operatsııalary artyq teńgelik ótimdilikti alýǵa baǵyttalǵan. UB  operatsııalarynyń saldosy qyrkúıektiń sońynda 1,5 trln teńge boldy.

«Qysqa merzimdi nottar negizgi qural bolyp tabylady. Qyrkúıektiń sońynda aınalystaǵy nottar kólemi  2,7  trln teńge boldy. Nottar boıynsha kiristiliktiń shuǵyl bolýyna baılanysty 8,84-9,66 paıyz aralyǵynda  qalyptasýda», - dedi ol.