Qazaqstannyń alǵashqy shańǵy ekspedıtsııasy Soltústik polıýsti baǵyndyrdy
Saıahatqa qatysýshylarynyń biri Sergeı Bodrov búgin Astanadaǵy Ortalyq kommýnıkatsııalar qyzmetinde bul sapardan alǵan óziniń áseri týraly aıtyp berdi.
«Úsh kún buryn men Soltústik polıýste sumdyq jaǵdaılarda, qaqaǵan aıazda boldym, týǵan jerge oraldym - barlyǵy keremet, shóp jaıqalyp tur, taza aýa, bastysy - jyly. Buǵan men qatty qýanyshtymyn», - dep atap ótti ol.
«Ekspedıtsııa bizde ońaı ótken joq. Jerdiń eń soltústik bóliginde, aýyr jaǵdaılarda: muz bop qatqan muhıt arqyly óttik, muzdyń jarylǵan jerlerinen sekirip, kóptegen asýlardy eńserdik, shatyrda turdyq. Qazaqstannyń Memlekettik Týyn jáne Qazaqstan halqy Assambleıasynyń jalaýyn qadaý - bizdiń basty maqsatymyz boldy. Bul mıssııany biz abyroımen jáne jyldam aıaqtadyq, uıyqtamadyq, az tamaqtandyq, shapshań qımyldadyq, biraq Týlardy planetamyzdyń eń soltústik núktesine jetkizdik», - dep atap ótti S.Bodrov.
Aıta keteıik, shańǵy ekspedıtsııasy Barneo - Soltústik Polıýs aralyǵyn qamtydy. Top 31 naýryzda Almatydan Máskeýge, Máskeýden - Norvegııanyń Oslo qalasyna, odan ári Longıırge attanǵan bolatyn. Al 4 sáýirde Longıırden Barneo muzdy aerodromyna ushyp baryp, sol jerden Soltústik polıýske deıingi shańǵy ekspedıtsııasyn bastady.
Barneodan Soltústi polıýske deıin araqashyqtyq shamamen 200 shaqyrymdy qurady. Jolda ekspedıtsııaǵa qatysýshylar muzdyń jarylǵan jerlerimen, muz shoǵyrlarynan, al muzdaqtardyń arasymen ótkende arnaıy kıimmen jáne ekspedıtsııalyq polıar shanalarymen júzip ótti.
«Bizdiń saıahattyń taǵy bir kózdegen maqsaty Norvegııanyń túpki halqynyń etnogenezin zertteý edi. Norvegııalyqtardyń arǵy atalary Saq taıpalarynan degen boljam bar. Biz Oslo qalasyndaǵy Fram mýzeıinde jergilikti turǵyndarmen jáne sol jaqta turyp jatqan qazaqstandyqtarmen tildestik. Sonymen qatar Longır qalasynda Qazaqstan kúnderin ótkizdik. Oǵan Norvegııa men Ulybrıtanııa jurtshylyǵy belsene atsalysty. Barlyǵy qyzyq ótti», - deıdi «Qazaq geografııalyq qoǵamy» QU prezıdıým múshesi Tólegen Tastanbekov.