Qazaqstannyń AQSh-taǵy konsýldyq qyzmetkerlerine dıplomatııalyq artyqshylyqtar beriledi
Zań jobasy boıynsha negizgi baıandama jasaǵan QR Syrtqy ister mınıstri Muhtar Tileýberdiniń aıtýynsha, QR men AQSh arasyndaǵy yntymaqtastyq Qazaqstan Tuńǵysh Prezıdenti - Elbasy Nursultan Nazarbaevtyń 2018 jylǵy AQSh-qa saparynyń qorytyndysy boıynsha ornatylǵan keńeıtilgen strategııalyq seriktestik rýhynda damyp keledi jáne odan ary nyǵaıýda. Qazaqstan men AQSh arasynda barlyq deńgeıde turaqty saıası dıalog júrgizilýde.
«Ótken jyldyń ishinde elimizdiń barlyq Mınıstrler kabıneti AQSh-ta is-saparlarmen boldy jáne QR Premer-Mınıstriniń saparymen aıaqtaldy. Sonymen qatar osy jyldyń aqpan aıynda AQSh Memlekettik hatshysy Maık Pampeonyń Qazaqstanǵa resmı sapary ótti. Elbasy saparynyń qorytyndysy boıynsha San-Frantsıskoda QR Bas konsýldyǵyn ashý týraly sheshim qabyldandy. Osylaısha qazirgi ýaqytta AQSh aýmaǵynda Qazaqstanynyń eki Bas konsýldyǵy jumys isteıdi. Al bizdiń elde AQSh tarapy úshin óńirlik hab qyzmetin atqaratyn Ortalyq Azııadaǵy jalǵyz Almaty qalasyndaǵy AQSh-tyń bas konsýldyǵy bar»,- dedi ol.
Mınıstrdiń atap ótýinshe, ratıfıkatsııalanatyn kelisim konsýldyq laýazymdy tulǵalar men olardyń otbasy múshelerine dıplomatııalyq ımmýnıtetter men artyqshylyqtardy qamtamasyz etýge qatysty máselelerdi retteıdi. 1961 jylǵy dıplomatııalyq qatynastar týraly Vena konventsııasyna sáıkes, kelisim negizinde eki memlekettiń konsýldyq mekemeleriniń qorǵalatyn konsýldyq laýazymdyq tulǵalary, konsýldyq qyzmetshileri jáne olardyń otbasy músheleri zańdyq ımmýnıtettermen qamtamasyz etiletin salyqtar men alymdardan ózara bosatylady.
«Eki eldiń ózara paıdalanatyn ımmýnıtetteri men artyqshylyqtaryn kúsheıtý konsýldyq laýazymdy tulǵalardyń jáne konsýldyq qyzmetshilerdiń qyzmetine oń áserin tıgizetin bolady. Sonymen qatar kelisimdi iske asyrý AQSh-ta QR azamttarynyń múddelerin usyný jáne qorǵaýdyń tıimdiligin arttyrady», - dedi Muhtar Tileýderdi.
Zań jobasy talqylanǵannan keıin senatorlar oǵan biraýyzdan qoldaý bildirdi. Osylaısha «Qazaqstan Respýblıkasynyń Úkimeti men Amerıka Qurama Shtattarynyń Úkimeti arasyndaǵy Konsýldyq artyqshylyqtar men ımmýnıtetter týraly kelisimdi ratıfıkatsııalaý týraly» QR zańy qabyldandy.