Qazaqstannyń AQSh-qa shyǵaratyn taýar eksporty ósýi múmkin
Kezdesýler Dúnıejúzilik bank pen Halyqaralyq valıýta qorynyń jyl saıynǵy kóktemgi sessııasynyń is-sharalary sheńberinde ótti.
Dúnıejúzilik bank «Ádil ósim, qarjy jáne ınstıtýttar» baǵytynyń vıtse-prezıdenti Indermıt Gıllmen kezdesýde UEM basshysy Qazaqstan men Bank 30 jyldyq jemisti strategııalyq yntymaqtastyǵyn atap ótti, sondaı-aq Qazaqstannyń turaqty ekonomıkalyq damýyna baǵyttalǵan bolashaq birlesken jobalar týraly habarlady.
Ulttyq ekonomıka mınıstri DB tobynyń vıtse-prezıdenti – bas ekonomısi Karmen Raınhartpen jahandyq jáne óńirlik ekonomıkalyq damýdyń perspektıvalary men trendterin talqylady. Atap aıtqanda, jahandyq qaryzdyń ulǵaıýyna, ınflıatsııanyń jedeldeýine baılanysty táýekelder jáne fıskaldyq ımpýlstar men azyq-túlik daǵdarysy taqyryptary qozǵaldy.
Óz kezeginde, AQSh saýda mınıstriniń orynbasary Marısa Lagomen qazaqstandyq delegatsııa ózara saýda áleýetin arttyrý, atap aıtqanda, Qazaqstannan AQSh-qa metallýrgııa, hımııa, ınjenerlik jáne tamaq ónerkásibi taýarlarynyń 75-ten astam ataýy eksportynyń ósý múmkindikteri talqylandy.
Sapar barysynda Qýantyrov Ortalyq Azııa elderi, sondaı-aq Ázerbaıjan, Shveıtsarııa, Polsha jáne Serbııa ókilderiniń qatysýymen DB jáne HVQ shveıtsarııalyq kishi tobynyń otyrysyna qatysty. Óz sózinde ol Qazaqstandaǵy aǵymdaǵy ekonomıkalyq jaǵdaı jáne áleýmettik-ekonomıkalyq reformalar týraly aıtyp berdi.
Jumys sapary aıasynda Qazaqstan delegatsııasy AQSh Saýda palatasy janyndaǵy ekonomıkalyq reformalar boıynsha bıznes-qaýymdastyqpen dóńgelek ústelge qatysty. Іs-shara AQSh-tyń saýda-ınvestıtsııalyq qurylymdarynyń ókilderi, bıznes-qoǵamdastyǵynyń keń aýqymy úshin jańa ınvestıtsııalyq saıasatty qalyptastyrýǵa nazar aýdara otyryp, Qazaqstannyń makroekonomıkalyq baǵytynyń basymdyqtary jáne jańa ekonomıkalyq saıasat sharalary týraly habardar etýge baǵyttalǵan. Kezdesý barysynda Ulttyq ekonomıka mınıstri AQSh Qazaqstannyń eń iri ınvestorlarynyń úshtigine kiretinin atap ótti.
«1991 jyldan beri elimizge Amerıkadan $60 mlrd-tan astam ınvestıtsııa salyndy. Bizdiń elimizde amerıkandyq kapıtaldyń qatysýymen munaı-gaz, hımııa, qurylys, taý-ken metallýrgııasy, mashına jasaý jáne basqa da salalarda 500-den asa kompanııa jumys isteıdi. 2021 jyly taýar aınalymy 29%-ǵa ulǵaıyp, $2,2 mlrd-qa jetti», - dedi Álibek Qýantyrov.
Odan ári beınekonferentsbaılanys rejıminde A.Qýantyrov AQSh Saýda ókiliniń kómekshisi (USTR) Krıs Ýılsonmen kezdesti, onda taraptar aǵymdaǵy áleýmettik-ekonomıkalyq reformalar týraly pikir almasty, sondaı-aq Qazaqstannyń Bas preferentsııalar júıesi baǵdarlamasynyń benefıtsıary mártebesin saqtaýyn talqylady.
Sonymen qatar, UEM basshysy Moody's, Standard&Poor's jáne Fitch Ratings halyqaralyq reıtıng agenttikteriniń basshylyǵymen kezdesýler ótkizdi. Mınıstr olarmen sanktsııalyq teketires jaǵdaıynda óńir men eldiń ekonomıkalyq damýynyń perspektıvalary men syn-qaterlerin talqylady.
Aǵymdaǵy jyldyń aqpan, sáýir aılarynda Fitch Ratings jáne Standard&Poor's ishki jáne syrtqy syn-qaterlerge jaýap retinde QR Úkimeti sharalarynyń tıimdiligin baǵalaǵalap, Qazaqstannyń táýelsiz kredıttik reıtıngin «turaqty» boljammen ınvestıtsııalyq senimdilik deńgeıinde rastady.