Qazaqstannyń agroónerkásip kesheninde kredıttik seriktestikter qaýymdastyǵy quryldy
Onyń bolashaqtaǵy maqsaty - qazirgi kúni elimizdiń aýyl aımaǵynda jumys jasap jatqan kredıttik uıymdardyń basyn biriktirý, dep habarlady «Agrarlyq nesıe koropratsııasy» AQ baspasóz qyzmeti.
Qaýymdastyq qurý týraly sheshim «QazAgro» ulttyq kompanııasynyń enshiles kompanııasy - «Agrarlyq nesıe korporatsııasy» AQ uıymdastyrǵan kredıttik seriktestikterdiń jalpy otyrysynda qabyldandy.
Jıynǵa Korporatsııanyń áriptesi bolyp tabylatyn 124 Kredıttik seriktestik tóraǵalary qatysty. Budan ózge, aýyldaǵy sharýashylyqtarǵa nesıe berý máselesimen birge, Qaýymdastyq qurý týraly máseleni talqylaýǵa QR Parlamenti Májilisiniń depýtaty Tólegen Ibraev, QR aýyl sharýashylyǵy vıtse-mınıstri Músilim Ómirııaev, «QazAgro» holdınginiń basqarma tóraǵasy Dýlat Aıtjanovtar qatysty.
Atap ótý kerek, qazirgi kúni elimizdiń aýyl aımaǵynda jumys jasap jatqan kredıttik seriktestikter kezinde Korporatsııanyń belsendi qoldaýymen qurylǵan bolatyn. Onyń kómegimen 2001 jyldan 2013 jyldarǵa deıingi merzim aralyǵynda elimizdiń 13 oblysyndaǵy 160 aýdanda 163 kredıttik seriktestik quryldy. Bul Qazaqstandaǵy aýyldyq aýmaqtyń 90,4%-yn qamtıdy (respýblıka aýmaǵynda 177 ákimshilik aýdan, onyń ishinde 22 qala mańyndaǵy aýyldyq aýmaq bar). 2013 jylǵy qańtardyń 1-i kúngi málimet boıynsha, Kredıttik seriktestikter quramyna 8 114 aýylsharýashylyq qurylymy, onyń ishinde 82%-y - sharýa qojalyqtary, 10%-y - JShS, 8 %-y - ózge de uıymdar (AQ, JK.). 2001-2012 jyldar aralyǵynda kredıttik seriktestikterdi nesıeleý úshin bıýdjetten - 46 926,9 mln.teńge bólinip, tolyq ıgerildi. 2001-2012 jyldar aralyǵynda elimizdegi 161 kredıttik seriktestikke jalpy somasy 98 627,7 mln. teńgeniń kredıttik qarjysy berildi. Ótken jyly «Agrarlyq nesıe korporatsııasy» Atyraý, Aqmola, Qaraǵandy, Batys Qazaqstan oblystarynda taǵy da jańa 8 kredıttik seriktestikterdi qurý isin maquldady.
Jıynǵa qatysqan kredıttik seriktestik tóraǵalarynyń ortaq pikirinshe, bul qurylymdy qurý isi olardyń ortaq múddelerin respýblıkalyq deńgeıde qorǵaýǵa, sonymen birge respýblıkadaǵy kredıttik seriktestikter jumysyn odan ári damytýǵa jáne olardyń jeke qurylym bolyp qalyptasýyna, aýyldaǵy nesıeleý jumysyn tıimdi júrgizýge oń yqpalyn tıgizedi. Qaýymdastyqty qurý týraly bastamany jıynǵa qatysýshylar biraýyzdan qabyldady. Olardyń daýys berýi boıynsha, kóp upaı jınaǵan Aqmola oblysyndaǵy «Tselınogradskoe» Kredıttik seriktestigi JShS tóraǵasy Saǵadat Áshebekov - Kredıttik Qaýymdastyq tóraǵasy bolyp saılandy.
Qaýymdastyqtyń jańa tóraǵasy Saǵadat Qaıyrjanulynyń aıtýynsha, «buǵan deıin ár keredıttik seriktestik óz betinshe jumys jasady. Biraq qazirgi kúni bizdiń ortaq kúshimizdi bir uıymǵa toǵystyrýdy kezi keldi, osy arqyly biz elimizdegi aýyl sharýashylyǵynyń damýyna jáne aýyldaǵy kásipkerlikti qarjylandyrýdaǵy máselelerdi tolyqqandy sheshýge múmkindik aldyq. Sondyqtan biz úshin mundaı qaýymdastyqty qurý úlken qajettilikten týyndap otyr».
Óz kezeginde «Agrarlyq nesıe korporatsııasy» AQ jańa uıymnyń qurylýyna qoldaý tanytyp, onyń bolashaqtaǵy jumysyna sáttilik tiledi. Korporatsııa ókilderiniń pikirinshe, Qaýymdastyqtyń keleli keńesinde aıtylatyn ortaq sheshimder, qazaqstandaǵy kredıttik seriktestikterdiń keń aýqymdy jumysyna jańa serpin beredi degen senimde.