Qazaqstannyń agrarlyq ǵylymynda 1250 adam jumys isteıdi - «QazAgroInnovatsııa» AQ prezıdenti
Bul týraly búgin Astanadaǵy S.Seıfýllın atyndaǵy Qazaq Agrotehnıkalyq ýnıversıtetinde ótken «Sáken taǵylymy» atty 8-inshi Respýblıkalyq ǵylymı-teorııalyq konferentsııada «QazAgroInnovatsııa» AQ-nyń prezıdenti Serik Kenenbaev málim etti.
«Memleket ǵylymdy, sonyń ishinde agrarlyq ǵylymdy damytýǵa úlken mán berip otyr. 2007 jyly agrarlyq ǵylymǵa 2 mlrd. teńge bólinse, 2011 jyly ol 6 mlrd. teńgeni qurady. Agrarlyq ǵylym úsh baǵdarlama boıynsha qarjylandyrylady - agroónerkásiptik keshen salasyndaǵy qoldanbaly ǵylymı zertteýler; ınfraqurylymdy, materıaldyq-tehnıkalyq bazany jaqsartýǵa jarǵylyq kapıtaldy arttyrý; oqytý semınarlaryn ótkizý», - dedi ol.
Degenmen, «QazAgroInnovatsııa» basshysynyń aıtýynsha, Qazaqstanda agrarlyq ǵylym ózge eldermen salystyrǵanda az qarjylandyrylady. Máselen, Qazaqstanda agrarlyq ǵylymǵa bólingen qarjyny bir ǵylymı qyzmetkerge shaqqanda 16 myń 300 AQSh dollarynan keletin bolsa, Argentınada ol 182 myń AQSh dollaryn quraıdy. Sol sııaqty, aýyl sharýashylyǵy damyǵan elder Frantsııa men Brazılııada qarjylandyrý aýyl sharýashylyǵyndaǵy jalpy ónimniń 3 paıyzyn quraıdy.
Kadrlyq áleýetke toqtalǵan S.Kenenbaev, búgingi kúni agrarlyq ǵylymda 1250 adam jumys isteıtindigin atap ótti. Onyń 593 - ǵylym kandıdattary, 172 - ǵylym doktorlary.
Sondaı-aq ol, 2012-2014 jyldarǵa arnalǵan agroónerkásiptik keshendegi zertteýlerdiń basymdyqty baǵyttarynyń baǵdarlamasy ázirlengendigin málim etti. Onda 5 baǵyt aıqyndalǵan - ósimdik sharýashylyǵyndaǵy óndiristiń tıimdiligin arttyrý; mal sharýashylyǵyndaǵy óndiristiń tıimdiligin arttyrý; ósimdik jáne mal sharýashylyǵy ónimderin qaıta óńdeý tıimdiligin arttyrý; tabıǵı resýrstardy basqarý tıimdiligin arttyrý jáne AÓK-niń ekonomıkalyq tıimdiligin jáne básekege qabilettiligin arttyrý.