Qazaqstannyń 4 óńirinde týrızmdi damytý áleýeti zertteldi

NUR-SULTAN. QazAqparat – 2021 jyly agrotýrızmdi damytýǵa qatysty zertteý jumystary ózge oblystarda jalǵasyn tabady. Bul týraly elordada ótken agrotýrızm men qolónerdi nasıhattaýǵa arnalǵan kezdesýde aıtyldy, dep habarlaıdy QazAqparat tilshisi.

«Ótken jyly týrızmniń jol kartasyna engen basty is-sharanyń biri – agrotýrızm men qolónerdi týrızm nysany retinde nasıhattaý edi. Ótken jyly biz agrotýrızmge salasy boıynsha strategııalyq josparlaýǵa qatysty úlken jumys atqardyq. Álemdik tájirıbeni, sonyń ishinde Belarýste týrızm salasyn zerttep kórdik. Sondaı-aq, Aqmola, Túrkistan, Almaty, Jambyl oblystarynyń dalasyna zertteý jumysy júrgizildi. Zertteý jumysyn Qazaqstan agro jáne aýyldyq týrızm qaýymdastyǵy áli de jalǵastyrýda», - deıdi «Kazakh Tourism» UK» AQ týrıstik ónimderdi damytý departamentiniń dırektory Danıel Serjanuly.

Sondaı-aq, ol ótken jyly agro, ekotýrızmge qatysty eki aqparattyq týr uıymdastyrylǵanyn aıtty.

«Joǵaryda atap ótken tórt oblysqa barǵan kezde ol jaqtyń týrızmdi damytý áleýeti qandaı ekenin, turǵyndardyń bul salany damytýǵa degen qulshynystary qandaı ekenin, ol jaqta qandaı sharalar ótkizýge bolatynyn zerttep kórdik. Ol jqtaǵy turǵyndar týrızm arqyly tabys tabýǵa bolatynyn bilmeıdi. Olardy osy salany damytýǵa úıretýimiz kerek. Infraqurylymǵa qatysty máseleler de bar, biraq onyń bári birtindep sheshimin taýyp kele jatqany qýantady. Zertteý jumysy barysynda týrızmdi damytý modeli jasaldy. Bul jumystar 2021 jyly ózge oblystarda jalǵasyn tabady», - deıdi ol.