Qazaqstannyń 4 oblysynda qandastardy beıimdeý ortalyqtary ashylady

NUR-SULTAN. QazAqparat – Qazaqstannyń 4 oblysynda qandastardy beıimdeý ortalyqtaryn ashý máselesi pysyqtalyp jatyr. Bul týraly Májilis depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

«2021 jyly Soltústik Qazaqstan, Pavlodar, Shyǵys Qazaqstan jáne Qostanaı oblystarynda beıimdeý jáne yqpaldastyrý ortalyqtaryn qurý máselesi pysyqtalýda. HQKO men Beıimdeý ortalyqtarynda qandastar máselelerine qatysty barlyq qyzmetter memlekettik tilde kórsetiletinin atap ótý qajet», - dedi Premer-Mınıstr.

Sonymen qatar onyń atap ótýinshe, respýblıkamyzǵa keletin etnıkalyq qazaqtar úshin qolaıly jaǵdaı jasaýdy, sondaı-aq óńirlerdiń áleýmettik-ekonomıkalyq damýynyń belgilengen kórsetkishterin eskere otyryp, qonys aýdarýshylardy jáne qandastardy qabyldaýdyń óńirlik kvotalaryn qalyptastyrýdy kózdeıtin Kóshi-qon saıasatynyń 2022-2026 jyldarǵa arnalǵan tujyrymdamasynyń jobasy ázirlenip jatyr.

«Eldegi kóshi-qon jáne demografııalyq protsesterin turaqtandyrý, sondaıaq qandastar quqyqtaryn saqtaý máseleleri Úkimettiń turaqty baqylaýynda», - dedi Asqar Mamın.