Qazaqstannyń 4 qalasynda ǵana káriz sýyn tazalaıtyn qurylǵy durys jumys istep tur

NUR-SULTAN. QazAqparat - Qazaqstannyń 4 qalasynda ǵana káriz sýyn tazalaý qurylǵysy durys jumys istep tur. Bul jaıynda Sybaılas jemqorlyqqa qarsy qyzmet uıymdastyrǵan onlaın suhbat barysynda QR Indýstrııa jáne ınfraqurylymdyq damý mınıstrligindegi «Adaldyq alańy» jobalyq keńsesiniń jetekshisi Bolat Qasymov aıtty, dep habarlaıdy QazAqparat tilshisi.

«Bizde eldi mekenderdiń basym bóligi káriz sýyn tazalaý qurylǵysymen qamtamasyz etilmegen. Qostanaı, Taraz, Semeı, Arqalyq, Jezqazǵan qalalarynda káriz sýyn tazalaý júıesi bolǵanymen, jumys istemeıdi. Tek 4 qalada, atap aıtqanda Nur-Sultan, Almaty, Taldyqorǵan jáne Shymkent qalasynda ǵana durys jumys jasap tur. Qalǵandarynda jańǵyrtýdy, kúrdeli jóndeýden ótkizýdi jáne keı jerlerde jańa tazartý qurylǵysyn salýdy qajet etedi», - dedi ol.

Onyń atap ótýinshe, qazirgi ýaqytta memleket bul máselege basa nazar aýdaryp otyr. Máselen, ótken jyldyń 12 sáýirinde ótken Qaýipsizdik keńesiniń otyrysynda Elbasy Nursultan Nazarbaev kázir sýyn tazalaý qurylǵysyn salý jáne jańǵyrtýǵa barynsha qoldaý kórsetýdi tapsyrǵan.

«Qazirgi ýaqytta 53 qalanyń jáne eldiń mekenniń tizimi jasaqtaldy. Bul sharýamen aınalysyp jatqan «Turǵyn úı kommýnaldyq-sharýashylyǵyn jańǵyrtý men damytýdyń qazaqstandyq ortalyǵy» bar. Biz olarmen tyǵyz jumys istep jatyrmyz. Ortalyq arnaıy baǵdarlama jasaýda jáne oǵan biz memlekettik organdarmen birge kómektesýdemiz. Qazaqstannyń ekologııalyq uıymdary qaýymdastyǵynyń bastamasymen atalǵan ortalyqpen birlesip, ǵylymı bilim berý konsortsıýmyn qurdyq. Nazarbaev Ýnıversıteti alańynda naryq qatysýshylaryn oqytý da josparlǵan», - dedi Bolat Qasymov.