Qazaqstannyń 350-ge jýyq kompanııasy alys shetelge júk tasymaldaýmen aınalysady

NUR-SULTAN. QazAqparat - QR Indýstrııa jáne ınfraqurylymdyq damý vıtse-mınıstri Erkebulan Daýylbaev alys-jaqyn shetelge tasymaldaýdy lıtsenzııalaý tetigi týraly baıandady, dep habarlaıdy QazAqparat.

«Búginde otandyq tasymaldaýshylar álemniń 42 elimen jasalǵan avtomobıl tasymaldary týraly úkimetaralyq kelisimder aıasynda júk tasymaldaýdy júzege asyrýmen aınalysyp júr. Osy kelisimderdiń 34-i júk tasymaldaýdyń tolyq ruqsat beretin, altaýy tek úshinshi elderge/elderden tasymaldaýǵa ruqsat beretin, ekeýi jol júrýdiń tolyq ruqsat beretin júıesin qarastyrady», - dep jazdy Erkebulan Daýylbaev depýtattyq saýalǵa jaýabynda.

Osyǵan baılanysty, halyqaralyq avtomobıl tasymaly ishki naryǵynyń múddelerin eskere otyryp, sheteldik ókiletti organdarmen ruqsat blankterimen (shamamen 140 myń birlik) almasý júzege asyrylady. Bul blankter avtomattandyrylǵan júıede úlestirilip, suranys kórsetilgen tasymaldaý túrine ruqsaty bar otandyq tasymaldaýshylarǵa beriledi.

«Alys shet elderge tasymaldaýmen 7 615 avtokólik parki bar 350-ge jýyq otandyq kompanııa aınalysyp otyr. Bul rette, qolda bar málimetterge sáıkes, Qazaqstanda halyqaralyq tasymaldaýmen 13 eldiń (Latvııa, Lıtva, Germanııa, Reseı, Grýzııa, Belarýs, Túrkııa, Nıderlandy, Italııa, Aýǵanstan, Pákistan, Iran jáne BAÁ) sýbektileriniń qatysýymen 41 birlesken kásiporyn jáne shamamen 2 myńǵa jýyq kólikten turatyn park aınalysýda», - dep túıindedi vıtse-mınıstr.