Qazaqstannyń 2030 jyldarǵa deıingi otbasylyq jáne genderlik saıasaty tujyrymdamasynyń jobasy tanystyryldy
Memlekettik hatshy Elbasynyń Qazaqstan Respýblıkasy Parlamenti sessııasynyń bıylǵy 1 qyrkúıektegi ashylýynda aıtqan «Qazaqstan Táýelsizdiginiń 25 jyldyq mereıtoıyn qarsy alý - jyldyń eń negizgi oqıǵasy. Bizge elimizdiń barlyq jetistigin saralap, mańyzdy nátıjelerdi barlyq qazaqstandyqtarǵa jetkizý óte qajet» degen sózine basa nazar aýdardy.
G.Ábdiqalyqova Ulttyq komıssııa bastamashylyq jasaǵan «25 paıdaly is» respýblıkalyq aktsııasyn ótkizýde áıelder qaýymynyń zor úlesi bar ekenin jetkizdi. Aktsııa aıasynda daryndy jetim balalardy qoldaý, balalar medıtsınalyq mekemelerin saýyqtyrýǵa arnalǵan jabdyqtarmen qamtamasyz etý, kásipker áıelderdi tegin oqytý jáne basqa da áleýmettik mańyzdy sharalar ótti.
Otyrysta Áıelderge qatysty kemsitýshiliktiń barlyq túrin joıý týraly tujyrymdamany oryndaý barysy jónindegi Joǵarǵy sottyń, Bas prokýratýranyń, Іshki ister mınıstrliginiń, Densaýlyq saqtaý jáne áleýmettik damý mınıstrliginiń aqparattary tyńdaldy.
Áıelder men erlerdiń teńdigin qoldaý, áıelderdiń quqyqtary men múmkindikterin keńeıtý - BUU-nyń Myńjyldyq damý maqsattarynyń biri. Búgingi kúni Qazaqstan Dúnıejúzilik ekonomıkalyq forýmnyń jahandyq reıtınginde 47-orynda tur.
Sot ádilettiligine qol jetkize almaı júrgen áıelderden ulttyq komıssııaǵa jıi shaǵym túsedi. Mysaly, 2015 jyly sotqa túsken qylmystyq ister boıynsha jábirlenýshilerdiń 43,1%-i - áıelder men balalar.
Elimizde turmystyq sıpattaǵy zorlyq-zombylyqty azaıtýǵa baǵyttalǵan naqty sharalar qabyldanýda. Zańnamalyq turǵydan quqyq buzýshylarǵa yqpal etýdiń tıimdi tetikteri engizildi. Polıtsııa qyzmetkerlerine quqyq buzýshylarmen profılaktıkalyq áńgime ótkizý, qorǵaý uıǵarymyn shyǵarý, sonymen qatar sot aldynda quqyq buzýshylardyń tártibine erekshe talaptar qoıý ókilettigi berildi. «Turmystyq sıpattaǵy zorlyq-zombylyqtyń aldyn alý týraly» zańdy qabyldaǵan kezden beri ishki ister organdary qyzmetkerleri 206 myńnan asa qorǵaý uıǵarymyn shyǵardy, sottar quqyq buzýshylar tártibine qatysty 22,5 myń erekshe talap qoıdy.
Densaýlyq saqtaý jáne áleýmettik damý mınıstrligi «Jumyspen qamtý jol kartasy 2020» aıasynda áıelderdi jumyspen qamtýǵa yqpal etý úshin qabyldanyp jatqan is-sharalar týraly habarlady. Búgingi kúni áleýmettik kelisimshartqa 74,8 myń áıel qol qoıǵan, onyń 46,8%-y - aýyl turǵyndary. 2015 jyly 76,8 myń áıel adam jumysqa ornalastyrylǵan.
Qazaqstan Respýblıkasynyń Eńbek kodeksine áıelderdiń eńbek jaǵdaıyn jaqsartý men densaýlyǵyn qorǵaý jóninde ózgerister engizildi. Áıelderdiń eńbegin paıdalanyp ketýge tyıym salyndy, áıelderge aýyr zattardy kóterýge jáne qozǵaýǵa shekteý qoıatyn normalar qarastyrylǵan, 287 jumys túrin qamtıtyn tizim bekitildi.
Sonymen qatar, 2006-2016 jyldarǵa arnalǵan Qazaqstan Respýblıkasyndaǵy genderlik teńdik strategııasyn oryndaý týraly Jambyl jáne Batys Qazaqstan oblysy ákimdikteriniń aqparattary tyńdaldy.
Otyrysta Memleket basshysynyń tapsyrmasy boıynsha ázirlengen Qazaqstan Respýblıkasynyń 2030 jyldarǵa deıingi otbasylyq jáne genderlik saıasaty tujyrymdamasy jobasynyń tanystyrylymy ótti. Ol qazirgi jaǵdaıdyń erekshelikterin eskere otyryp, Qazaqstanda otbasylyq jáne genderlik saıasatty jańa sapaly deńgeıge kóterýge arnalǵan.
Otyrysty qorytyndylaǵan Memlekettik hatshy qaralǵan máseleler boıynsha memlekettik organdarǵa naqty tapsyrmalar berdi.