Qazaqstannyń 11 óńirinde tabysy az otbasylardyń balalary azyq-túlik jıyntyqtaryn aldy
«Olardyń qatarynda Aqmola, Aqtóbe, Atyraý, Qaraǵandy, Qostanaı, Qyzylorda, Mańǵystaý, Shyǵys Qazaqstan, Batys Qazaqstan oblystary, Almaty jáne Pavlodar qalalary bar. Alýshylardyń jalpy sany 9,6 myń otbasyndaǵy 17,6 myń balany qurady. Jalpy, ataýly áleýmettik kómek (AÁK) alatyn tabysy az otbasylardaǵy 1 jastan 6 jasqa deıingi 64 myń balany qamtý josparlanýda», - delingen Eńbek jáne halyqty áleýmettik qorǵaý mınıstrligi málimetinde.
Esterińizge sala keteıik, Memleket basshysy Qazaqstan halqyna Joldaýynda AÁK taǵaıyndaý tetigin onyń ashyqtyǵyn, ádildigin jáne eńbekke degen yntasyn qamtamasyz etý maqsatynda túzetýge tapsyrma bergen bolatyn. Memlekettik kómektiń jańa sharalary 2020 jylǵy 1 qańtardan bastap keshendi túrde júzege asyrylýda. Oǵan kópbalaly otbasylarǵa arnalǵan jańa memlekettik járdemaqy, ataýly áleýmettik kómek, tabysy az otbasylardaǵy balalarǵa arnalǵan kepildik berilgen áleýmettik toptama kiredi.
1 jastan 6 jasqa deıingi balalarǵa arnalǵan KBÁT azyq-túlik jıyntyǵyn jáne turmystyq hımııa taýarlarynyń jıyntyǵyn qamtıdy. 6 jastan 18 jasqa deıingi balalar úshin mektepterde ystyq tamaq, oqý quraldary men mektep kıimderin berý kózdeledi. Sondaı-aq, osy sanattaǵy balalar úshin mektepke deıingi jol júrý shyǵyndaryn óteıtin bolady.
Azyq-túlik jıyntyǵy balalardyń jas sanatyna baılanysty óz quramy boıynsha erekshelenedi: 1 jastan 3 jasqa deıin jáne 3 jastan 6 jasqa deıin, biraq áleýmettik toptamanyń quramy óńirge qaramastan birdeı. Jıyn quramy fızıologııalyq erekshelikterdi, azyq-túliktiń taǵamdyq jáne energetıkalyq qundylyǵynyń araqatynasyn jáne jasyna sáıkes olardy paıdalaný normalaryn eskere otyryp, Densaýlyq saqtaý mınıstrliginiń usynymdary negizinde qurylǵan. Ónimder dárýmenge baı, bul ósip kele jatqan aǵzadaǵy dárýmenderdiń jetispeýshiligin óteýge múmkindik beredi.
1-den 3 jasqa deıingi balalarǵa arnalǵan jıyntyq sút, pechene, botqa, úlpek jáne balalar pıýresin qamtıdy. 3 jastan 6 jasqa deıingilerge arnalǵan azyq-túlik jıyntyǵy sútten, makaronnan, suly úlpekterinen, kúnbaǵys maıynan, gematogennen, tańǵy asqa arnalǵan sút jastyqtarynan, balalar pechenesinen, arpa, qaraqumyq jarmasynan, burshaq pen baldan turady.
1 jastan 6 jasqa deıingi balalarǵa arnalǵan turmystyq hımııa taýarlarynyń jıyntyǵyna tis pastasy, şetka, krem-sabyn, sabyn, sýsabyn, untaq jáne krem kiredi. Tabysy az otbasynyń árbir balasyna osy jıyntyq toqsan saıyn beriletin bolady.