«Qazaqstannyń 100 jańa esiminiń» tabys tarıhyn jan-jaqty kórsetý mańyzdy - Dáýren Abaev

ASTANA. QazAqparat - «Qazaqstannyń 100 jańa esimi» jobasyna qatysýshylardyń tabys tarıhyn aqparat quraldarynda jan-jaqty kórsete bilý de asa mańyzdy. Mundaı pikirdi búgin «Qazaqstannyń 100 jańa esimi» jobasy boıynsha jumys jáne sarapshylyq toptyń kezekti otyrysynda QR Aqparat jáne kommýnıkatsııalar mınıstri Dáýren Abaev bildirdi, dep habarlaıdy QazAqparat.

«Elbasy usynǵan «Rýhanı jańǵyrý» baǵdarlamasynyń aıasyndaǵy bul joba ónerimen, bilimimen qoǵamǵa sińirgen eńbegimen, erekshe qasıetterimen daralanǵan azamattarǵa úlken múmkindik týǵyzyp otyr. Osyǵan oraı jańa esimderdi anyqtaýda jurtshylyq ta joǵary belsendilik tanytýda. Ózderińizge málim, bıylǵy jylǵy 7 maýsymnan bastap 15 qyrkúıekke deıin elimizdiń túpikir-túpkirinen jobaǵa qatysýshylardan ótinish qabyldandy», - dedi mınıstr.

Onyń aıtýynsha, osy ýaqyt ishinde el.kz  portalynda 2 212 kandıdat tirkeldi. Qazirgi kúni olardy irikteý jumystary júrgizilip jatyr.

 

«Sonymen qatar qatysýshylardy irikteýden bólek, olardyń tabystarynyń tarıhyn aqparat quraldarynda jan-jaqty kórsete bilý de asa mańyzdy.  Sonda ǵana bul shara tárbıelik ári ıdeologııalyq turǵyda óz jemisin bermek. Aqparat jáne kommýnıkatsııalar  mınıstrligi men Qazaqstan halqy Assambelıasy bul baǵytty iske asyrý boıynsha da júıeli  sharalardy qolǵa alýda. Atap aıtqanda, 100 jańa esim  atanýǵa  úmitker azamattar týraly derekti fılmder tsıkli túsirilýde», - dedi Dáýren Abaev.

 

Otyrysqa qatysqan Qazaqstan halqy Assambleıasy tóraǵasynyń orynbasary Darhan Myńbaı 100 jańa esimge usynylyp otyrǵan kandıdattar aldaǵy ýaqytta jan-jaqty talqyǵa túsetindigin basa aıtty.

«15 qyrkúıekte ótinishterdi qabyldaýdy aıaqtadyq. Endi aldaǵy ýaqyttaǵy jumystardyń algorıtmi jasalatyn bolady. Eń bastysy bul jumystarǵa Assambleıa músheleri belsene qatysty.  Sonyń ishinde 500 adamnyń ómirbaıany tirkeldi. Jalpy aımaqtardan 900-ge tarta usynys jasaldy», - dedi Darhan Myńbaı.