«Qazaqstannyń 100 jańa esiminiń» 4-kezeńi: Jeńimpaz atanǵan almatylyqtar kimder
Bul joba 2017 jyldan bastap «Rýhanı jańǵyrý» baǵdarlamasy aıasynda básekege qabilettilik, pragmatızm men bilimge tabyný ıdeıalaryn ártúrli mamandyqtaǵy naqty adamdardyń arqasynda iske asýda.
Tórt jyldyń ishinde jobaǵa 7 myńnan astam adam qatysty, olardyń 163-i jeńimpaz atandy. 46-sy – almatylyqtar.
Baıqaýdyń tórtinshi kezeńinde barlyq jeti sala boıynsha («Qoǵam», «Mádenıet pen sport», «Medıtsına», «Ǵylym men ınnovatsııa», «Bıznes», «Ekologııa» men «Bilim») úsh myńǵa jýyq qazaqstandyq ótinim bergen, arasynda 9 almatylyq fınalıs bar. Oǵan kásipkerler, ǵalymdar, jýrnalıster, sportshylar, muǵalimder men eriktiler qatysqan.
Almaty ákiminiń orynbasary Erjan Babaqumarov jeńimpazdarǵa alǵys hattar tabys etti.
«Jobada Táýelsizdik jyldarynda jetistikke jetken, jeńiske ózderiniń talanty, eńbekqorlyǵy arqyly básekege qabiletti ári tabysty beınesin qalyptastyrýǵa óz úlesterin qosqan adamdar jetti. Bizdiń Otanymyz daryndy azamattarǵa jaǵdaı jasaıdy. Patrıotızmde Otanǵa degen súıispenshiligimiz mańyzdy. Bizdiń elimiz jastardyń jetistikke jetýine múmkindik beredi. Joba jeńimpazdary mıllıondaǵan adam úshin úlgi», – dedi Erjan Babaqumarov.
«100 esimge» engenderdiń ishinde QazUAÝ halyqaralyq vaktsınologııa ortalyǵynyń dırektory, professor Qaısar Tabynov bar. Ǵalym «Ǵylym men ınnovatsııa» salasynda jeńimpaz atandy: ol óz tobymen birge sońǵy 15 jyl ishinde qaýipti ınfektsııalarǵa qarsy 10-ǵa jýyq vaktsına jasady. Onyń biregeı jobalary qazirdiń ózinde qoldanylady.
Jeńimpazdar qatarynda jańashyl ári tabysty kásipker Taır Batalov ta bar. Ol astyq naryǵyndaǵy álemdik aınalymnyń 80% deıin kólemin qamtyǵan kompanııa qurý arqyly myńnan astam jumys ornyn qurdy.
Jeńimpazdar tizimine professor, jýrnalıst ári «Turan-TV» telearnasynyń júrgizýshisi, Abylaıhan atyndaǵy QazHQjÁTÝ oqytýshysy Madına Áshimova kirdi. Ol sondaı-aq «Nomad» saıahatshylar klýbyn uıymdastyrady.
«Men birqatar áleýmettik jobanyń uıymdastyrýshysymyn, jýrnalıst bolyp jumys isteımin ári JOO-da sabaq beremin. Jas qazaqstandyqtarǵa óz armanyna jetý kerektigin kórsetkim keledi. Meniń jobaǵa qatysýym áıeldiń taǵdyry tek otbasy men úıde ǵana emes ekenin kórsetedi», – dedi Madına Áshimova.
Sondaı-aq «100 jańa esim» jobasynyń jeńimpazdary qatarynda fotograf, «OKO STUDIO» negizin qalaýshy Danııar Sárseıuly, AQSh-taǵy hokkeı klýbynyń jattyqtyrýshysy, Princeton Tiger Lilies komandasynyń bas jattyqtyrýshysy, sportshy ári hokkeı shabýylshysy Bulbul Kartanbaı, startaper, Warwick Boring negizin qalaýshy ári bas ınjeneri Taıjan Sanjar, hımııa pániniń muǵalimi, japondyq anıme «Narýto» arqyly mektep páninen sabaq beretin Ulan Úsenov, Kzphdgirlsunion eriktiler jobasynyń negizin qalaǵan, Carl Zeiss kompanııasyndaǵy ekstremaldy ÝK-lıftografııa salasyndaǵy ǵalym Ámına Mırsakıeva jáne AQSh-taǵy Qazaq time jobasynyń júrgizýshisi Danııar Qojan bar.