«Qazaqstannyń 100 jańa esimi» jastardy jańa jeńisterge jigerlendirý úshin kerek
«Memleket basshysy Nursultan Nazarbaev bıylǵy sáýirde jarııalanǵan «Bolashaqqa baǵdar: rýhanı jańǵyrý» atty maqalasynda Úkimet aldyna qoǵamdyq sanany jańǵyrtý úshin naqty tapsyrmalar qoıǵany belgili. Sodan atalǵan baǵdarlamalyq maqalada kórsetilgen basym baǵyttardy oryndaýdyń tetikteri anyqtalyp, artynsha ony júzege asyrýdyń jumystary bastalyp ta ketti. Elbasy maqalasynyń basym alty baǵyty bar ekenin búginde barshamyz jaqsy bilemiz. Ol birneshe baǵdarlamadan da turady. Árbiriniń formasy, júzege asý tetigi ártúrli bolǵanymen, barshasynyń maqsaty - halyqtyń sanasyn jańǵyrtý, rýhanı qundylyqtarymyzdy qaıta tiriltý», - dedi ol.
Osy oraıda Nurjan Joldybalınov «100 jańa esim» jobasyna toqtalyp, qazir ózin sózben emes, ispen dáleldep, ózgelerge úlgi bolyp júrgen azamattardy tarıh betine shyǵarýymyz kerektigin basa aıtty.
«Olardyń is-áreketteri ózge zamandastaryna úlgi bolary anyq. Demek bul joba jeke bir adamdardy nasıhattaý nemese olardyń abyroıyn asqaqtatý maqsatynda júzege asyp jatqan joq. Munyń artynda rasymen de úlken ıdeologııalyq astar jatyr. Jobada naqty adamdardyń naqty taǵdyrlary men ómirbaıandary arqyly búgingi, zamanaýı Qazaqstannyń kelbeti kórinis tabady. «Biz «janyńda júr jaqsy adam» degen sózdiń baıybyna bara bermeımiz. Shyn máninde, Táýelsizdik dáýirinde óziniń eńbegimen, bilimimen, ónerimen ozyp shyqqan qanshama zamandastarymyz bar. Olardyń júrip ótken joldary - kez kelgen statıstıkadan artyq kórsetkish. Sondyqtan olardy televızııalyq derekti týyndylardyń keıipkerine aınaldyrýymyz kerek. Jastar ómirge shynaıy kózben qarap, óz taǵdyrlaryna ózderi ıelik ete alatyn azamattar bolýy úshin olarǵa úlgi usynýymyz kerek» degen edi Elbasy osynaý joba týrasynda», - dedi ol.
Onyń aıtýynsha, ár kezeńniń, ár dáýirdiń óz ıdeologııasy bolady. Osy oraıda ult ıdeologııaǵa emes, ıdeologııa ultqa qyzmet etýi tıistigin esten shyǵarmaǵanymyz abzal.
«Máselen, keshegi soǵys jyldary qazaq jastaryna Nurken Ábdirov, Álııa Moldaǵulova, Mánshúk Mámetova, Tólegen Toqtarovtar ıdeal retinde usynyldy. Meıli, qaı formatsııada ómir súrse de, ıdealdyń aty - ıdeal. Álııa, Mánshúkke uqsaǵannan qazaq jastary jaman bolǵan joq. Odan keıin 70-80 jyldary beıbit zamannyń batyrlary paıda boldy. Olarǵa eliktedik. Eshkim jaman bolǵan joq, qaıta solardyń erlikterin qaıtalaǵysy kelgen jastardyń sany artty. Al búgin biz jańa dáýirde ómir súrip jatyrmyz. Demek, jańa zamanǵa jańa ıdealdar kerek! «Qazaqstannyń 100 jańa esimi» jobasy eń birinshi kezekte osy úshin kerek! Jastarymyzdy jańa jeńisterge jigerlendirý úshin kerek! Máselen, Táýelsizdikten keıingi kezeńde zamandastaryna úlgi-ónege bolatyn qanshama tulǵalar ósip-jetildi. Meıli sport salasy bolsyn, meıli ǵylym men ónerde bolsyn, meıli óndiris pen sharýashylyqta bolsyn, osy bir jańa esimderdi ıdeal etýge ábden bolady. Al rýxanı jańǵyrýdy eń birinshi kezekte júzege asyratyn kimder?! Álbette, ıdealdar! Endeshe, bul jobanyń ózi der kezinde qolǵa alynǵan joba boldy dep esepteımin», - dedi Nurjan Joldybalınov.
Aıta keteıik, búgin QR Prezıdent Ákimshiliginiń basshysy Áset Isekeshevtiń tóraǵalyǵymen Qoǵamdyq sanany jańǵyrtý baǵdarlamasyn júzege asyrý boıynsha ulttyq komıssııanyń kezekti otyrysy ótip, onda Aqparat jáne kommýnıkatsııalar mınıstri Dáýren Abaev Elbasynyń «Rýhanı jańǵyrý» baǵdarlamasy aıasynda «100 jańa esim» jobasy nelikten bıyl qaıtadan ótkiziletinin aıtyp bergen edi.