«Qazaqstannyń 100 jańa esimi» qataryna qalaı kirýge bolady

ASTANA. QazAqparat - «Qazaqstannyń 100 jańa esimi» jobasyna qatysý úshin jańa formatta jasalǵan «100esim.el.kz» saıtyna ótinim joldaýǵa bolady, dep habarlaıdy QazAqparat tilshisi.

«Portaldyń jańa formaty iske qosyldy. Qazirgi ýaqytta ótinim qabyldaý jumystary júrgizilip jatyr. Portaldyń kómegimen búginge deıin jobaǵa 60 qatysýshy ótinim berdi. Ótinimderdi qabyldaý 15 qyrkúıekte aıaqtalady. Osylaısha, ár qazaqstandyq óziniń jetistikke toly ómir jolyn onlaın rejımde joldaı alady», - dedi QR Aqparat jáne kommýnıkatsııalar mınıstrliginiń baspasóz hatshysy Albına Aten Feısbýktegi paraqshasynda.

Qazirgi kezde saıtqa mádenıet, ǵylym, sport, qoǵam jáne medıtsına salalarynda jetistikterge jetken 27 adamnyń ómir joly týraly málimet engizilgen.

Táýelsizdik jyldarynda tabysqa jetken «Qazaqstannyń 100 jańa esimin» anyqtaý úshin arnaıy jumys toby da quryldy.

Aıta keteıik, QR Prezıdenti Nursultan Nazarbaev «Bolashaqqa baǵdar: rýhanı jańǵyrý» atty maqalasynda «Qazaqstannyń 100 jańa esimi» jobasyn qurý bastamasyn kótergen bolatyn.