«Qazaqstannyń 100 jańa esimi» 12 kúnnen keıin anyqtalady

ASTANA. QazAqparat - El.kz ınternet-jobasynyń redaktsııasy 29 qazan kúni Astanadaǵy «Mega Silk Way» saýda, oıyn-saýyq ortalyǵynda «Qazaqstannyń 100 jańa esimi» jobasynyń aqtyq kezeńiniń qatysýshylaryna daýys jınaý úshin oflaın-aktsııa ótkizdi, dep habarlaıdy QazAqparat.

Kúni boıy jýrnalıster ortalyq qonaqtaryna joba qatysýshylary men daýys berý erejeleri týraly aıtty. Ər adam laıyqty dep tapqan kandıdatqa jyljymaly pýnktterde daýystaryn berdi. Barlyǵy 150-den astam adam «Qazaqstannyń 100 jańa esimi» jobasyna qatysýshylarǵa qoldaý bildirdi. 

«Bizdiń redaktsııamyz mundaı sharalardy jıi ótkizedi. Esterińizde bolsa, osy jobanyń birinshi kezeńinde - 30 tamyz kúni Bəıterek monýmentiniń janynda jobaǵa  ótinishti oflaın qabyldaýdy ótkizgen bolatynbyz. Aktsııa tamasha nətıje bergen soń, kelesi kezeńde de osyndaı sharalardy ótkizýdi jón kórdik. Osy arqyly biz joba týraly keńinen aqparat berip, daýys berýge qoǵamdy barynsha belsendirýdi kózdeımiz. Bizdi halyqtyń joba týraly habardar bolýy, daýys berýge belsendi túrde qatysýy qýantty. Alaıda joba týraly estimegen, kandıdattardy bilmeıtin adamdar da barshylyq eken. Sondyqtan da osy shara əli de jalǵasyn tabady», - dedi El.kz portalynyń jaýapty redaktory Oleg Rıabchenko.

Eske salaıyq, 18 qazan kúni www.100esim.el.kz saıtynda jobaǵa qatysýshy fınalısterge daýys berý bastaldy. Barlyq úmitkerler qyzmet salasyna qaraı 6 kategorııaǵa ornalastyryldy, olar: ǵylym, sport, medıtsına, qoǵam, bıznes jáne mádenıet. Qazir fınalısterge berilgen daýys sany - 31 myń. Onlaın daýys berý 10 qarashada aıaqtalady. Onyń nátıjesi boıynsha "Qazaqstannyń 100 jańa tulǵasy" anyqtalady.

Aıta keteıik, «Qazaqstannyń 100 jańa esimin» anyqtaý bastamasyn Elbasy Nursultan Nazarbaev óziniń «Bolashaqqa baǵdar: rýhanı jańǵyrý» maqalasynda kótergen bolatyn.