Qazaqstannyń 10 qalasynda aýa lastanýynyń eń joǵarǵy deńgeıi tirkeldi

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Maǵzum Myrzaǵalıev IX Azamattyq forýmda Qazaqstannyń negizgi ekologııalyq máselelerin atady, dep habarlaıdy QazAqparat tilshisi.

«Memleket basshysy Qasym-Jomart Kemeluly Toqaev bastamashy bolǵan «Halyq únine qulaq asatyn memleket» tujyrymdamasy azamattar men memleket arasyndaǵy dıalogty, ózara is-qımyl men yntymaqtastyqtyń negizin qalady. Osy baǵytta úkimettik emes uıymdar qoǵammen keri baılanysty qamtamasyz ete otyryp, azamattyq bastamalardy usynyp, memlekettiń naqty saıasatyn qalyptastyrýǵa belsendi aralasýda», - dedi mınıstr IX Azamattyq forýmda ótken kezdesýde.

Spıker tabıǵı resýrstardy saqtaý men uqypty paıdalaný respýblıka úshin asa mańyzdy mindetterdiń biri ekenin atap ótti.

«Elimizdiń ekologııalyq problemalary alýan túrli jáne olardy sheshý úshin keshendi tásil qajet. Negizgi ekologııalyq máselelerge toqtalsam, eń aldymen aýanyń lastanýy men óndiristik jáne turmystyq qaldyqtardy basqarýdyń tómen deńgeıin aıtar edim. Úshinshiden, Qazaqstannyń túrli óńirlerinde qorshaǵan ortanyń lastanýy máselesi baıaǵydan bar», - deıdi M. Myrzaǵalıev.

Mınıstrdiń aıtýynsha, 10 qalada (Aqtóbe, Atyraý, Nur-Sultan, Almaty, Shymkent, Óskemen, Qaraǵandy, Temirtaý, Balqash, Jezqazǵan) aýa lastanýynyń eń joǵarǵy deńgeıi tirkelgen.

«Emıssııalardyń jalpy kólemi 2,5 mln tonnany qurasa, sonyń 56% - Qaraǵandy men Pavlodar oblystaryna tıesili», - dedi M. Myrzaǵalıev.