Qazaqstannyń 1,5 myńǵa jýyq júk vagony Ýkraınada qaldy – mınıstrlik

NUR-SULTAN. QazAqparat - Elimizdiń 1,5 myńǵa jýyq júk vagony Ýkraına aýmaǵynda qalyp otyr. Bul týraly QazAqparat QR IIDM silteme jasap habarlaıdy.

«2022 jylǵy 11 naýryzdaǵy jaǵdaı boıynsha Ýkraınadan qazaqstandyq menshik ıelerine tıesili 57 júk avtokóliginiń 49-y shyqty. Osylaısha, bul eldiń aýmaǵynda 8 júk kóligi, onyń ishinde ýkraındyq júrgizýshileri bar Qazaqstannyń 4 júk kóligi qalyp otyr. Sonymen qatar, Ýkraınada elimizdiń azamattaryna tıesili 1457 júk vagony tur. Olardy basqa baǵyttarǵa jiberý jumystary jalǵasýda», - delingen mınıstrlik habarlamasynda.

Halyqaralyq tasymaldarda týyndaǵan máseleler boıynsha jedel áreket etý úshin QR IIDM, «Qazaqstan temir joly» UK» AQ jáne elimizdiń teńiz porttary janynan «Jedel jeliler» ashyldy. Múddeli taraptarmen kelissózder júrgizilip jatyr.

Aqtaý jáne Quryq teńiz porttary qalypty rejımde jumys istep tur. Júkter bógelip jatqan joq.