Qazaqstannyń ulttyq pavılony 60-ynshy Venetsııa óner bıennalesinde usynylady

<p>ASTANA. KAZINFORM &ndash; Qazaqstan Prezıdentiniń Italııaǵa resmı sapary aıasynda Italııa Respýblıkasy Mınıstrler Keńesiniń tóraǵasymen birlesip, elimizdiń Venetsııadaǵy 60-ynshy Halyqaralyq zamanaýı óner bıennalesine qatysýy týraly birlesken málimdeme jasaldy. Bul týraly&nbsp;QR Mádenıet jáne aqparat mınıstrliginiń baspasóz qyzmeti habarlady.&nbsp;</p>

QR Mádenıet jáne aqparat mınıstriligi álemniń bedeldi kórmeleriniń birinde eldiń Ulttyq pavılonyn uıymdastyrý boıynsha barlyq qajetti sharalardy qabyldady. Pavılonnyń komıssary QR Mádenıet jáne aqparat mınıstri Aıda Balaeva boldy.

Endigi jerde álemniń túkpir-túkpirinen kelýshiler kórmede «Jeruiyq» kókjıekten tys kózqaras» jobasynyń ekspozıtsııasymen tanysýǵa múmkindik aldy. Bul ekspozıtsııa «Jerūiyq» mıftik jer týraly ejelgi ańyzdyń zamanaýı ınterpretıtsııasy.

Kórmede qazaqstandyq óner tarıhyndaǵy alǵashqy fýtýrıstik týyndylardyń biri Kamıl Mýllashevtiń «Jer jáne ýaqyt. Qazaqstan», sondaı-aq Erbolat Tólepbaıdyń zaman rýhyn kórsetetin «Jańa bala.Qaıta týylý» monýmentaldy kenebi.

Sondaı-aq, Sáken Narynovtyń «Bir jannyń alty ómiri» jáne «Bastaýdyń sońy nemese sońynyń basy» eksperımenttik jobalary men Sergeı Maslovtyń «Baıqońyr-2» ınstallıatsııasy usynylady.

Bıennalege quramynda Elena Pozdnıakova men Eldar Tagı kiretin «The2vvo» sýretshiler toby «Qatysý» saýnd-ınstallıatsııasymen qatysady, al sýretshi Anvar Músirepov «Alastaý» eksperımentaldy mıstıkalyq beıne essesin usynady.

Qazaqstandyq sýretshilerdiń óner kórmesine qatysýy «Viled FASHION» JShS, «Qazaq oil» JShS jáne «Universal Energy Kazakhstan» JShS bas demeýshileriniń qoldaýymen uıymdastyrylady.

Mereıtoılyq óner bıennalesi 2024 jyldyń 20 sáýiri men 24 qarashasy aralyǵynda jeti aı boıy Venetsııadaǵy «Navale» tarıhı ǵımaratynda ótedi.

Halyqaralyq óner kórmesi tuńǵysh ret 1895 jyly Venetsııada ótip, óner álemindegi ortalyq oqıǵalardyń birine aınaldy.

Kórmege ádette álemniń túkpir-túkpirinen ónerdi baǵalaýshy kórermender men mamandar keledi. 2022 jyly oǵan 800 myńnan astam adam keldi.