Qazaqstannyń ulttyq paralımpıada komandasy IV Azııa oıyndaryna attandy
4 jylda bir ret uıymdastyrylatyn jarysqa elimizdiń atynan 131 atlet qatysady. Olar 14 sport túrinen, ıaǵnı para jeńil atletıka, bochcha, para paýerlıftıng, shahmat, para júzý, para velosport, para dzıýdo, para kanoe, voleıboldy otyryp oınaý, para taekvondo, para sadaq atý, para ústel tennısi, akademııalyq esý jáne para oq atý sport túrlerinen 485 medal úshin talasady. Aıta ketý kerek, Qazaqstan quramasy 2010 jyldan beri Azııanyń Para oıyndaryna tórtinshi ret qatysýda.
«2010 jyly Qytaıda bastaýyn alǵan Azııa Para oıyndaryna Qazaqstan sportshylary úzdiksiz qatysyp, el namysyn abyroımen qorǵap keledi. Bıylǵy jyly da elimizdiń atynan 131 sportshy 14 sport túrinen qatysady. Baıraqty básekede para sportshylarymyz úzdikter qatarynan kóriný úshin memleket tarapynan barlyq jaǵdaı jasaldy. Bıyldyń ózinde ulttyq qurama sportshylary 40-tan astam sporttyq is-sharaǵa, 30-dan astam oqý- jattyǵý jıyndaryna qatysyp, biliktilik shyńdady. Endigi kezek ózderińizde. Biz sizderge senemiz!
Azııa Para oıyndarynda sáttilik tileımin!», - dedi QR Týrızm jáne sport mınıstri Ermek Marjyqpaev.
Aıta keteıik, Azııa oıyndarynda júlde alǵan sportshylar men olardyń jattyqtyrýshylaryn aqshalaı yntalandyrý maqsatynda qurlyq chempıony atanǵan sportshyǵa 10 000 AQSh dollary kóleminde aqshalaı syıaqy beriledi. Al, altyn medal ıegerin jarysqa daıyndaǵan jattyqtyrýshyǵa 5000 AQSh dollary qarastyrylyp otyr. Qurlyq birinshiliginiń kúmis júldegeri 5000 AQSh dollary, al jattyqtyrýshysy 3000 AQSh dollary kóleminde syıaqy alady. Sondaı-aq, qola medal enshilegen qurama sportshysyna 3000 AQSh dollary, al onyń jattyqtyrýshysyna 2000 AQSh dollary kóleminde aqshalaı yntalandyrý belgilengen.
Jarysqa sary qurlyqtaǵy 43 memleketten 4 myńǵa jýyq sportshy qatysady. Olar sporttyń 22 túrinen jalpy sany 564 medal (paralımpıadalyq sport túrinen - 490 jáne paralımpıadalyq emes sport túrinen - 74) jıyntyǵyn ózara sarapqa salady.