Qazaqstannyń sý qoımalaryna 75 mlrd tekshe metr sý jınaldy

<p>ASTANA. KAZINFORM &ndash; Bıyl 800 myń gektarǵa jýyq egis alqabyn sýarýǵa 7,6 mlrd tekshe metr sý jiberilmek. Bul týraly Sý resýrstary jáne ırrıgatsııa mınıstrligi habarlady.</p>

Sýarý kezeńi bastalǵaly eldegi 20 myńnan astam sharýa sýarmaly sýmen turaqty qamtamasyz etilgen. Búgingi tańda «Qazsýshar» fılıaldary dıhandarǵa shamamen 3 mlrd tekshe metr sý jiberdi.

«Qazaqstannyń 6 óńirinde – Almaty, Túrkistan, Qyzylorda, BQO, ShQO jáne Jetisý oblystarynda «Qazsýshar» fılıaldary 600 shaqyrymnan astam kanaldy mehanıkalyq ádispen tazalaıdy. Sonymen qatar, jóndeý josparlanǵan 400-den astam gıdrobekettiń 102-i jóndeldi. Qazaqstannyń sý qoımalarynda 75 mlrd tekshe metr sý jınaldy. Bul ótken jylmen salystyrǵanda 15 mlrd tekshe metrge artyq. Sý qoımalarynda jınalǵan sýdyń 12 mlrd astamy – tasqyn sý», - dedi mınıstrliktiń resmı ókili Móldir Ábdýalıeva Ortalyq kommýnıkatsııalar qyzmetinde.

Sý tasqyny kezinde Balqash kóline 3,3 mlrd tekshe metr, al Kaspıı teńizine – shamamen 6 mlrd tekshe metr sý jiberildi. 80 mln tekshe metr tasqyn sýy BQO Qamys-Samar kólderine jiberildi, bul kólderge shamamen 20 jyl boıy sý barmaǵan.

Sonymen qatar, jyl basynan beri Soltústik Aral teńizine 1,1 mlrd tekshe metr sý keldi.

Al Ulytaý oblysynan Qyzylorda oblysyna 839 mln tekshe metr sý jiberildi. Osynyń arqasynda, alǵash ret Sarysý ózeni arqyly Qyzylorda oblysynyń kólderine sý jetti.

«2000 jyldan beri alǵash ret Tobyl ózenine de sýdyń kóp kelgeni baıqaldy. Tobyl ózeni kaskadynyń iri sý qoımalary tasqyn sýdy qaýipsiz ótkizýdi qamtamasyz etti jáne 92% toldy. Barlyq jınalǵan tasqyn sýy aýyl sharýashylyǵy men ónerkásipte paıdalanylady», - dedi M. Ábdýálıeva.