Qazaqstannyń Syrtqy ister mınıstri Rýmynııa basshylyǵymen kezdesýler ótkizdi

<p>Qazaqstan Respýblıkasy Premer-Mınıstriniń orynbasary &ndash; Syrtqy ister mınıstri Murat Nurtileý Býharestke resmı sapary aıasynda Rýmynııa Premer-mınıstri Marchel Cholakýmen jáne Parlament Senatynyń tóraǵasy Nıkolae Chýkemen kelissózder ótkizdi, dep habarlaıdy <a href="https://kaz.inform.kz/news/katti-ayazdan-turkstan-oblisinda-zholdar-zhabilip-mektepter-onlaynga-kosht-7c27df/Kazinform" target="_blank" rel="noopener">Kazinform</a>.</p>

Rýmynııa Úkimet basshysymen kelissózder barysynda ekonomıkalyq yntymaqtastyqty tereńdetý jáne ekijaqty taýar aınalymynyń kólemin ulǵaıtý jáne ártaraptandyrý úshin qolda bar barlyq áleýetti paıdalaný joldary qarastyryldy.

QR syrtqy saıası vedomstvosynyń basshysy búgingi kelissózder qazaq-rýmyn ózara is-qımylyn damytýdyń jańa kezeńin ashatynyna senim bildirdi.

«Sońǵy úsh onjyldyqta Qazaqstan men Rýmynııa saıası dıalog pen jemisti ekonomıkalyq yntymaqtastyqtyń joǵary deńgeıine qol jetkizdi. Keshendi kún tártibin ilgeriletýdiń salmaqty zańnamalyq bazasy men tıimdi ekijaqty tetikteri quryldy», – dep málimdedi M.Nurtileý.

Óz kezeginde M. Cholaký kóp qyrly ekijaqty kooperatsııany tereńdetýge degen kózqarasyn rastady.

«Biz Eýropalyq odaqtyń strategııalyq seriktesi – Qazaqstanmen yntymaqtastyqqa erekshe mán beremiz jáne energetıka, kólik jáne logıstıka, aýyl sharýashylyǵy jáne tsıfrlandyrý sııaqty basym salalarda úılestirý jónindegi birlesken is-qımyl josparyn qabyldaýdy usynamyz», – dep atap ótti Premer-mınıstr.

Taraptar birlesken úkimetaralyq komıssııa men Іskerlik keńestiń áleýetin belsendi paıdalanýǵa, sondaı-aq beıindi mınıstrlikter basshylarynyń saparlarymen almasýǵa ýaǵdalasty.

Sol kúni mınıstr M.Nurtileý Parlament Senatynyń tóraǵasy N.Chýkemen kezdesti.

Taraptar parlamentaralyq jáne saıası dıalogtyń damý dınamıkasyn joǵary baǵalady, sondaı-aq ekijaqty ózara is-qımyl perspektıvalaryn talqylady. Dostyq toptarynyń qyzmetin jandandyrý arqyly eki eldiń parlamentteri arasyndaǵy baılanysty nyǵaıtý jáne eki eldiń zań shyǵarýshylary arasynda saparlar almasýdy uıymdastyrý ýaǵdalastyǵyna qol jetkizildi.