Qazaqstannyń shıkizattyq emes taýarynyń eksporty azaıǵan – Senat tóraǵasy

<p>ASTANA. KAZINFORM &ndash; Parlament Senatynyń tóraǵasy Máýlen Áshimbaev palata otyrysynda Qazaqstannyń shıkizattyq emes taýarlar eksporty álemdik naryqta tómendep bara jatqanyn aıtty.</p>

Qazaqstan úshin Eýrazııalyq ekonomıkalyq odaq aıasynda ónerkásip kooperatsııasyn, ónerkásip sektoryndaǵy birlesken jobalardy damytý negizgi basymdyqtardyń biri. Degenmen, shıkizattyq emes taýarlar eksportynyń tómendeýi otandyq ónerkásipti qoldaý, osy baǵytta tıimdi sheshimder qabyldaý kerektigin kórsetip otyr.

Máýlen Áshimbaev osyǵan baılanysty QR Ónerkásip jáne qurylys mınıstrligin shıkizattyq emes óndiristi damytý jolynda belsendi jumys isteýge, onyń ishinde EAEO múmkindikterin paıdalanýǵa shaqyrdy.

«Byltyr bul kórsetkish bizde (shıkizattyq emes taýarlardyń eksporty) shamamen 6 paıyzǵa tómendegen. Bul óte kóp. Demek, Qazaqstan shıkizattyq emes taýarlar eksportyn azaıtyp otyr degen qorytyndy jasaýǵa týra keledi. Bıyl – 7,2 paıyz boldy. Bul bizdiń strategııalyq basymdyqtarymyzǵa saı emes. Osy rette bizdiń shekaralas aýdandarymyzda seriktesterimizben birlesken birneshe iri joba bar. Atap aıtqanda, Qyrǵyzstanmen birlesip damytý kózdelgen arnaıy ındýstrııalyq aımaq («Aq-tilek – Qarasý» ótkizý pýnktiniń janynda) bar. Batys Qazaqstan oblysynda da osyndaı aımaq bar. Ony reseılik seriktestermen birge damytýǵa nıet etip otyrmyz. Ol ónimderdi basqa elderdiń naryqtaryna jetkizý úshin tıisti aýmaqtarda ónerkásip kooperatsııasyn damytý qajet. Bul turǵyda mınıstrlik belsendi jumys júrgizýge tıis», – dedi Senat tóraǵasy.

Aıta keteıik, búgin Senat Spıkeri Máýlen Áshimbaevtyń tóraǵalyq etýimen Palata otyrysy ótti. Onda senatorlar «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Eýrazııalyq ekonomıkalyq odaqqa múshe memleketter ónerkásip salalarynda birlesken kooperatsııalyq jobalardy iske asyrǵan kezde qarjylaı járdem kórsetý bóliginde ózgerister engizý týraly hattamany ratıfıkatsııalaý týraly» zańdy qarap, maquldady.

Zań normalary Eýrazııalyq ekonomıkalyq odaqqa múshe memleketterdiń kásiporyndary arasyndaǵy kooperatsııalyq baılanystardy keńeıtýge arnalǵan. Ol úshin qarjylyq yntalandyrýdyń arnaıy tetikteri kózdelip otyr. Qujat óndiris kólemin ulǵaıtýǵa, sondaı-aq qosymsha jumys oryndaryn ashýǵa múmkindik beredi.