Qazaqstannyń rekordshy ájeleri Gınness kitabyna enýdi kózdep otyr

<p>&laquo;Alaman quraq&raquo; respýblıkalyq baıqaýyna qatysqan Petropavldyń úsh turǵyny Qazaqstannyń rekordtar kitabyna endi. Ájeler elimizdiń basqa qolónershilerimen birge uzyndyǵy 500 metr quraq kórpe tigip shyqty, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Qazaqstannyń rekordtar kitabyna engenderdiń biri – Baqyt Mustafına. Onyń qolónerdi janyna serik etkenine 50 jylǵa jýyqtady Ine-jip ustaýdy jastaıynan anasynan úırengen Baqyt apa sodan beri quraq kórpeniń túr-túrin tikken. Sondyqtan baıqaýǵa qatysýǵa usynys túskende birden qup alǵan.

«Buǵan deıin «Taqııa-festke» qatystym. Sondyqtan bul joly da qýana iske kiristim. 500 metrlik kórpe tigý ońaı emes. Ári óz qarajatymyzǵa júrip-turdyq. Biraq qanshama jańa adammen tanystym, tájirıbe jınadym. Aqtyq saıysqa 200 qolónershi ǵana jetti», – deıdi Baqyt Mustafına.

Foto: Baqyt Mustafınanyń jeke muraǵatynan

200 qolónershiniń arasynda Ǵalııa Jaqına jáne Raıhan Suraǵanova da boldy. Máselen Raıhan apaıdyń negizgi mamandyǵy – muǵalim. 26 jyl mektepte eńbek etip, balalardy qolónerge baýlydy. Zeınet demalysyna shyqqannan keıin de súıikti isinen qol úzbeı, búginde Petropavldaǵy atelelerdiń birinde eńbek etedi.

«Bala kezimnen is tigýge jaqyn boldym. Áke-sheshem de ónerli adamdar edi. Bos otyrǵandy unatpaımyn, osyndaı baıqaýlarǵa qatysyp, únemi izdeniste júrgen unaıdy. Bul bizdiń ulttyq qolónerimiz, ony jastar arasynda nasıhattaýymyz kerek, bilgenimizdi úıretýimiz qajet», – deıdi Raıhan Suraǵanova.

Petropavldyq qolónershiler bul jetistikpen toqtap qalmaq emes. Gınnestiń rekordtar kitabyna ený úshin qazir áleýmettik jeli arqyly komanda jınap jatyr. Qańtar aıynda uıymdastyrýshylardan tapsyrma alyp, iske kirispek. Qazirdiń ózinde 17 adam baıqaýǵa qatysýǵa tilek bildirgen.

Foto: Kazinform