Qazaqstannyń memlekettik satyp alý júıesi qarapaıym halyqqa túsiniksiz be
Dúnıejúzilik bank Qazaqstannyń bıýdjet, qarjy saıasatyna jasaǵan sholýynda memlekettik satyp alý saıty qarapaıym halyqqa túsiniksiz ekenin málimdegen.
Іshki memlekettik aýdıt komıtetiniń ókilderi ótkizgen baspasóz máslıhatynda BAQ ókilderi vedomstvo basshylarynan osy synǵa qandaı jaýap qaıtaratynyn surady.
«Dúnıejúzilik bank bizdegi memlekettik satyp alýdyń sýbektisi emes. Bizdiń satyp alýǵa qatyspaıdy. Múmkin olar basqa satyp alý júıesin aıtyp otyrǵan shyǵar. Eger sol paıymyn bizge naqty hat nemese aýyzsha habarlama túrinde jetkizse, ol máseleni talqylaýǵa daıynbyz. Olar bizdiń memlekettik satyp alý saıty men kvazımemlekettik satyp alý saıtyn shatastyrýy múmkin», — deıdi ishki memlekettik aýdıt komıtetiniń Astana qalalyq departamenti basshysynyń orynbasary Áset Baıqýanyshev.
Komıtet ókili halyqaralyq qarjy uıymynyń mamandary aıtqan pikirmen kelispeıtinin aıtady.
«Men óz tarapymnan, osy salanyń mamany retinde ondaı oımen kelispeımin. Sebebi árbir áleýetti ónim berýshi bizdiń portalda jaqsy jumys isteıdi. Tipti bizden jaqsy isteıdi. Áleýetti ónim berýshi de — halyqtyń bir ókili. Sondyqtan halyq portaldy túsinbeıdi degen durys emes dep oılaımyn. Árıne, memlekettik satyp alýǵa qatysy joq kisiler bilmeýi múmkin. Sebebi olar memlekettik satyp alýmen aınalyspaıdy. Al biraq aınalysam degen kisi portaldyń ishinde búkil qadam naqty kórsetilgenin kóredi. Eshqashan memlekettik satyp alýmen jumys istemegen bolsa, bastapqy kezeńde kishigirim túsindirý jumystaryn júrgizý kerek shyǵar. Biraq ol máselemen bolashaqta áleýetti ónim berýshi bolam degen kisi oqýdan ótedi. Qazirgi tańda Astana qalasy boıynsha kóptegen jeke oqý beretin oryndar óte kóp», — dedi departament basshysynyń orynbasary.