Qazaqstannyń mal sharýashylyǵy ónimderi úshin Reseı naryǵyn ashty
Sheshim Qazaqstan Respýblıkasy men Reseı Federatsııasynyń Aýyl sharýashylyǵy mınıstrleri Aıdarbek Saparov pen Dmıtrıı Patrýshev arasyndaǵy jeltoqsandaǵy kelissózder barysynda qol jetkizilgen ýaǵdalastyqtardyń nátıjesinde qabyldandy.
«Qazaqstandyq ónimdi eksporttaýdaǵy kedergilerdi joıý jumystary Memleket basshysynyń tapsyrmasy aıasynda júrgizilýde. Bul - Qazaqstan men Reseıdiń aýyl sharýashylyǵy salasy úshin mańyzdy qadam, qos el arasyndaǵy saýda-ekonomıkalyq baılanysty nyǵaıtýǵa yqpal etedi», - dep atap ótti mınıstr.
2022 jyldyń qańtarynda Qaraǵandy oblysynda aýsyl aýrýynyń paıda bolýyna baılanysty RF-na qazaqstandyq ónimniń ımporty shektelgen bolatyn. Alaıda, 2 jyldyq úzilisten keıin Dúnıejúzilik janýarlar densaýlyǵy uıymynyń vaktsınatsııasymen resmı qolaıly aımaq mártebesine ıe Qazaqstannyń aımaqtarynan alynǵan mal sharýashylyǵy ónimderin jetkizýge naryq ashylady. Qalǵan óńirlerde jumys jalǵasady.
Kelisim aıasynda Reseıge sıyr eti, qoı eti, shoshqa eti, sút jáne sút ónimderi, sondaı-aq ózge de et ónimderin eksporttaý qoljetimdi.
Sonymen qatar, Qazaqstan men Reseıdiń aýylsharýashylyq mınıstrlikteri «EASÝ» AJ aqparattyq júıelerin «Argýs-Fıto» FMAJ jáne «Merkýrıı» (Rosselhoznadzor) FMAJ-men ıntegratsııalaýdy josparlaýda. Bul veterınarlyq-baqylaý protsedýralaryn jeńildetýge jáne ońtaılandyrýǵa, qajetsiz kedergilerdi joıýǵa, shekaralarda baqylaýdan ótý ýaqytyn avtomattandyrýǵa jáne qysqartýǵa múmkindik bermek.
Aıta keterligi, eki eldiń taýar aınalymynyń kólemi birdeı emes. Qazaqstannyń Reseıden tasymaldanatyn ımporty eksporttan áldeqaıda artyq. Sondyqtan, Aıdarbek Saparov Reseı naryǵyna qazaqstandyq ónimdi jetkizý kólemin ulǵaıtý múmkindigin qarastyrý qajettigin de aıtty.