Qazaqstannyń qaı startap jobalary álem elderinde tabysqa jetti

<p>ASTANA. KAZINFORM &ndash; Otandyq IT salasy jyl saıyn qarqyn alyp, damyp keledi. Buǵan deıin qazaqstandyq birneshe IT startap Sılıkon alqabyna joldama alǵanyn belgili. Osy oraıda, QR Tsıfrlyq damý, ınnovatsııalar jáne aeroǵarysh ónerkásibi mınıstrligi tabysqa jetken startaptar jaıynda Kazinform agenttigine egjeı-tegjeıli málimet berdi.</p>

«Otandastarymyzdyń startaptary ishki jáne syrtqy naryqta joǵary suranysqa ıe. Máselen, Ortalyq Azııanyń barlyq eli úshin úlken jetistikke aınalǵan Citix qazaqstandyq tehnologııalyq startap boldy. 2023 jyldyń jeltoqsanynda kompanııa Baidu, Tesla jáne SpaceX kompanııalaryna ınvestıtsııa salǵan Tım Dreıperden 1 mln dollardan astam qarjy tartty. Smart City jáne adTech salalarynda jumys isteıtin Citix Almaty men Astanada 130 smartbordtan turatyn jelini blokcheın tehnologııasymen basqaryp otyr. 2022 jyly kompanııa túrik naryǵyna shyqty, al 2023 jyly Taıaý Shyǵys pen Soltústik Afrıka aımaqtarymen yntymaqtastyq týraly memorandýmǵa qol qoıdy», — delingen mınıstrlik aqparatynda.

CodiPlay startapy jahandyq aýdıtorııaǵa baǵyttalǵan qazaqstandyq EdTech jobalarynyń biri sanalady. Jaqynda CodiPlay BUU Bas hatshysy qoldaıtyn bastama Digital Public Goods Alliance (DPGA) tarapynan tsıfrlyq qoǵamdyq ıgilik retinde tanyldy. CodiPlay balalar arasynda IT salasyndaǵy saýattylyqty arttyrýǵa arnalǵan keshendi sheshimdi usynady. Sonymen qatar, 2024 jyldyń basynda startap Artificially Intelligent Learning Assistant (AILA) kompanııasymen strategııalyq seriktestik týraly memorandýmǵa qol jetkizdi. Osy kelisim aıasynda balalardyń IT salasyndaǵy saýattylyǵyn arttyrýǵa arnalǵan qosymsha Saýd Arabııasynyń 200 mektebinde engiziledi.

Foto: digitalbusiness.kz

Alaqan startapy alaqan tamyrlarynyń bıometrııalyq tanymyn qoldanatyn kontaktisiz tólem júıesin ázirledi. 2020 jyldan bastap joba Alaqan Pay, Alaqan Mektep jáne Alaqan HR degen úsh ónimdi usyndy. Búginde Alaqan-nyń 100 myń belsendi paıdalanýshysy bar jáne osy júıe arqyly aıyna 1,2 mıllıon sáıkestendirý jasalady. Qazir onyń 300 myń dollar ınvestıtsııasy bar. Kremnıı alqabynda akseleratsııadan ótken startap qazirgi kezde Qazaqstandaǵy bir mektepte tabysty qoldanylyp keledi. Joba mamandary ony elde jáne shetelde odan ári keńinen taratýdy josparlap otyr. Qazir jobaǵa Ońtústik-Shyǵys Azııa, Taıaý Shyǵys elderi jáne Túrkııa qyzyǵýshylyq tanytty. Bul elde júıeni 500 klınıkaǵa engizý josparlanǵan.

Grand Mobile — mobıldi oıyn. Joba mobıldi onlaın oıyn ındýstrııasynyń kóshbasshysyna aınaldy jáne App Store men Play Market reıtıngterinde jıi joǵary oryndarǵa shyǵyp turdy. Tek 2024 jyldyń sońǵy toqsanynda oıyn charttarda úsh ret birinshi orynǵa shyǵyp, oıyndy júkteý 55 mln-ǵa jetken. Aı saıyn oıyndy 5 mln-nan astam biregeı paıdalanýshy oınaıdy, al belsendi aýdıtorııanyń ósýi aı saıyn 35%-ǵa artyp keledi. Kompanııa oıyndy birneshe tilge aýdarýdy jáne 2024 jyldyń sońyna deıin belsendi aýdıtorııany eki esege arttyrýdy, sondaı-aq búkil álem boıynsha ártúrli oıyn qaýymdastyqtaryn qurý úshin jańa serverlerdi iske qosýdy josparlap otyr.

CerebraAI startapy ınsýlt dıagnozyn qoıý úshin jasandy ıntellekt jáne neıroradıologııa salasyna baǵyttalǵan. Byltyr startap AQSh-taǵy TechCrunch nusqasy boıynsha álemdegi eń úzdik startaptardyń biri retinde tanyldy jáne Stanford University janyndaǵy StartX kásipkerler klýbyna kirdi. CerebraAI 130 myńǵa jýyq skanerleýdi júzege asyrdy, al belsendi paıdalanýshylar qataryna 700-den astam nevrolog kiredi. Startap Stanford University nusqasy boıynsha 2023 jyldyń eń úzdik Digital Health jobasy bolyp tanyldy, Intel Software uıymdastyrǵan AI startaptar olımpıadasynda gran-prı jeńip aldy jáne kóptegen basqa halyqaralyq marapattarǵa ıe boldy.

OGames — búkil álemge Car Parking Multiplayer jobasymen tanymal qazaqstandyq mobıldi oıyndar stýdııasy. Oıyn avtosımýlıatorlar charttarynda kósh bastap keledi jáne Android, iOS jáne Nintendo Switch platformalarynda búkil álem boıynsha 100 mln-nan astam ret júktelgen. 2016 jyly qurylǵan kompanııa nebári birneshe jyl ishinde óz jobasynyń ınnovatsııalyq tásili men sapasy arqyly Qazaqstan men sheteldik aýdıtorııany, sonyń ishinde AQSh, Azııa, Ońtústik Amerıka jáne Eýropany qyzyqtyra aldy.

Foto: hightech.fm

Munymen qosa, Tsıfrlyq damý mınıstrliginiń málimetinshe, ArlanBiotech — qazir qoldanystaǵy tehnologııalardyń ishindegi eń jyldam jáne arzan AI negizindegi nanodenelerdi generatsııalaý jáne óndirý boıynsha jańashyl tehnologııa. Qazirgi kezde startap Google for Startups jáne Astana Hub-tan Silkway Accelerator akseleratsııalyq baǵdarlamasyn sátti aıaqtady. Arlan Biotech Astana Hub-tan 20 000 dollar kóleminde qarjylandyrý aldy, sondaı-aq pre-seed raýndynda BAÁ qorynan 200 000 dollar ınvestıtsııa tartty. Startap koronavırýsqa qarsy turatyn nanodenelerdiń rettiligi týraly eki qazaqstandyq patentke jáne antıgendik testterdi ázirleý patentine ıe.

Budan bólek, Higgsfield AI jobasy — jasandy ıntellekt negizindegi beıne jasaý jáne óńdeý platformasy. Platforma anaǵurlym jeke ári daralanǵan qoldanbalarǵa arnalǵan. Qazirgi kezde startap 8 mln dollar tartty. Pre-seed raýndyndaǵy negizgi ınvestor AQSh-tyń eń kóne venchýrlyq qorlarynyń biri — Menlo Ventures boldy. Higgsfield AI mátindi beınege aınaldyrýǵa arnalǵan Diffuse mobıldi qosymshasyn usynyp otyr.

Foto: Aleksandr Pavskıı/Kazinform

Jet — ol halyqaralyq startap jáne elektr samokattaryn mınýttyq jalǵa berý qyzmetiniń onlaın jáne oflaın operatsııalaryn biriktiredi. Startap Qazaqstan, Belarýs, Armenııa, Grýzııa, Ázerbaıjan, Mońǵolııa, Ózbekstan jáne Brazılııa naryqtarynda belsendi jumys istep jatyr. Jalpy alǵanda, parkte 35 000 samokat bar, al saparlar sany 27 mıllıonǵa jetti. 2023 jyly Jet AIX-te 3 mıllıard teńge kóleminde oblıgatsııalar ornalastyrdy.

Verigram — computer vision salasyndaǵy Qazaqstannyń alǵashqy startaptarynyń biri. Kompanııa 2017 jyly paıda boldy jáne naryqta jasandy ıntellekt kómegimen bıometrııalyq sáıkestendirý júıesimen tanymal. 2022 jyly Verigram Sıngapýr men Vetnamda óz keńselerin ashty.

ApartX — táýlikke jalǵa beriletin jyljymaıtyn múlik ıelerine arnalǵan mobıldi qosymsha. Qosymsha obektilerdi qashyqtan jáne qaýipsiz basqarýǵa múmkindik beredi. Qazir ApartX usynǵan múmkindikti 50 000 adam belsendi paıdalanyp jatyr, al ondaǵy páter qory 1500-ge jetti. Startap Qazaqstan, Reseı, Ózbekstan jáne Túrkııa naryqtarynda jumys istep keledi. Joba AirBnB jáne Booking.com sııaqty álemge tanymal jalǵa berý platformalaryna ıntegratsııalanǵan.

Parqour — avtokólikterdiń memlekettik nómirlerin taný tehnologııasy boıynsha turaqtardy avtomattandyrýǵa arnalǵan keshendi sheshim. Parqour Qazaqstan, AQSh, BAÁ, Shveıtsarııa, Indonezııa, Ózbekstan, Polsha, Ulybrıtanııa, Tájikstan jáne Ázerbaıjan naryqtarynda belsendi. Jobany Kanada, AQSh jáne Eýropanyń venchýrlyq qorlary 3 mln dollar kóleminde qarjylandyrdy.